ԵՐԵՎԱՆ, 21 դեկտեմբերի — Sputnik. ՌԴ-ում աշխատող ՀՀ քաղաքացիները ԵՏՄ-ին Հայաստանի անդամակցությունից հետո ավելի քիչ են դիմում Ռուսաստանի մարդու իրավունքների հանձնակատարին: Այս մասին այսօր Երևանում հայտնեց ՌԴ մարդու իրավունքների հանձնակատար Տատյանա Մոսկալկովան՝ հիշեցնելով, որ ԵՏՄ անդամակցությունից հետո ՀՀ քաղաքացիները Ռուսաստանում ստացել են աշխատանքային նույն իրավունքները, ինչ այդ երկրի քաղաքացիները: Աշխատանքի հատուկ թույլտվություն ստանալու կարիք այլևս չկա:
Պաշտոնական վիճակագրության համաձայն` անցնող տարում ՀՀ քաղաքացիները ՌԴ մարդու իրավունքների հանձնակատարին առավել հաճախ դիմել են այդ երկրում իրենց նկատմամբ հարուցված քրեական գործերի մասին տեղեկատվություն ստանալու խնդրով: Երկրորդ տեղում արդար քննություն չիրականացնելու մասին ահազանգերն են: Երրորդ տեղում ՌԴ միգրացիոն օրենսդրության խախտման հետևանքով վտարման որոշումների վերաբերյալ բողոքներն են, չորրորդ տեղում՝ ՔԿՀ-ներում և ձերբակալված անձանց պահման վայրերում ՀՀ քաղաքացիների իրավունքների խախտման մասին բողոքները:
«Ունենք նաև մեկ դիմում հեղինակային վարձատրության հետ կապված և մեկ բողոք դպրոցում երեխայի իրավունքների ոտնահարման վերաբերյալ»,- լրագրողներին հայտնեց Տատյանա Մոսկալկովան:
Եթե մինչ այժմ մարդու իրավունքների պաշտպանության գրասենյակ դիմելուց հետո այլ երկրների քաղաքացիները ստիպված էին երկար սպասել արձագանքի՝ կապված տեղեկատվության փոխանակման երկարատև ընթացակարգերի հետ, ապա այսուհետև այդ գործընթացը Հայաստանի և Ռուսաստանի քաղաքացիների համար շատ ավելի պարզեցված կլինի:
Այսօր Երևանում ՀՀ մարդու իրավունքների պաշտպան Արման Թաթոյանն ու ՌԴ մարդու իրավունքների հանձնակատար Տատյանա Մոսկալկովան ստորագրեցին հուշագիր, որի նպատակն է ամրապնդել ՄԻՊ ինստիտուտների համագործակցությունը և ավելի օպերատիվ արձագանքել ստեղծված խնդիրներին: Իսկ երկու կառույցների կապն ապահովելու համար երկու երկրներում նշանակվելու են ՄԻՊ հատուկ ներկայացուցիչներ:
«Ամենակարևորն այն է, որ անմիջական համագործակցություն կլինի Հայաստանի ՄԻՊ հատուկ ներկայացուցչի և ՌԴ-ի գործընկերոջ միջև: Ընդ որում, դա կարող է լինել ինչպես էլեկտրոնային շփման եղանակով, այնպես էլ հեռախոսակապով: Այսինքն՝ խիստ հրատապ դեպքերում գրավորից պետք է հնարավորինս ձերբազատվել»,- ասաց Արման Թաթոյանը՝ ավելացնելով, որ մինչ ՄԻՊ գրասենյակը նամակով դիմում է ռուսաստանյան գործընկերոջը, մինչ ստանում է պատասխան, երկար ժամանակ է անցնում, ինչը հնարավորություն չի տալիս բարձրացված խնդիրներին օպերատիվ արձագանքելու:
Այսուհետև նման դեպքերում ՄԻՊ-ը հնարավորություն կունենա ոչ միայն արագ արձագանքել քաղաքացու ներկայացրած հարցին, այլև անհրաժեշտության դեպքում ժամանակին իրավական խորհրդատվություն տրամադրել դիմողին:
