ԵՐԵՎԱՆ, 20 դեկտեմբերի — Sputnik, Դավիթ Գալստյան. Նիդեռլանդները հնարավոր է տեսնել մի քանի ժամում, եթե դուք հայտնվել եք աշխարհի ամենափոքր քաղաքներից ամենամեծ` «Մադուրոդամ» մանրանկարային այգում։
Հաագան հայտնի է առաջին հերթին իր Միջազգային դատարանով, բայց գողտրիկ այս քաղաքն այլ արժանիքներ էլ ունի։ Հյուսիսային ծովի ափին գտնվող հայտնի Սխևենինգեն հանգստավայրից ոչ հեռու` Հաագայում է գտնվում Մադուրոդամ այգին։ Դա աշխարհի ամենափոքր քաղաքներից ամենամեծն է և զբաղեցնում է ավելի քան 60 հազար քառակուսի կիլոմետր տարածք: Բաղկացած է տիպիկ հոլանդական շենքերից և կառույցներից, որոնց բնօրինակները գտնվում են Նիդեռլանդների տարբեր հատվածներում: Այստեղ ներկայացված է հոլանդական քաղաքների ճշգրիտ մոդելը, պարզապես ամեն ինչ փոքրացված է 25 անգամ։
«Մադուրոդամը» հատկապես հայտնի է Ամստերդամի, Հաագայի և Ռոտերդամի շենքերի մակետներով։ Այստեղ կարելի է տեսնել փառահեղ Թագավորական պալատը և Պետական թանգարանի շենքը, Մագրես Բրյուգ կամուրջը և Խաղաղության պալատը, նույնիսկ Սխիպխոլ օդանավակայանը։
Անհնար է անտարբեր անցնել Նյիվեկերկ և Վեստերկերկ եկեղեցիների, ինչպես նաև պորտուգալական սինագոգի և դրանց մանրակրկիտ մշակված դետալների կողքով։
Այստեղ կան այն բոլոր կարևոր կառույցները, որտեղ կուզեիք լինել, բայց ինչ-ինչ պատճառներով զրկված եք այդ հնարավորությունից:
Քաղաքն այցելուների վրա անջնջելի տպավորություն է թողնում։ Այստեղ ուրախանում են ոչ միայն երեխաները, որոնք կարող են «հանգցնել» կրակը տանկերի վրա կամ փակել ամբարտակի ջրարգելակները, որպեսի ջուրը չլցվի քաղաք, այլև մեծահասակները, որոնք հետ չեն մնում երեխաներից ու երբեմն նույնիսկ ավելի մեծ խանդավառությամբ են բեռներ տեղափոխում տախտակամածից կամ էլեկտրաէներգիա «արտադրում» հողմակայանների օգնությամբ։
Sputnik Արմենիայի թղթակիցը չի կարողացել զսպել իրեն և նույնպես մասնակցել է այդ «պատասխանատու» աշխատանքներին, և համոզվել է, որ երկու ժամը քիչ է խաղից կշտանալու համար…
Այգուն հատուկ գրավչություն է հաղորդում փոքրիկ գնացքների, նավերի, մեքենաների և նույնիսկ ինքնաթիռների ավտոմատացված երթևեկությունը։
Օրինակ՝ այգու երկաթուղու երկարությունը մի քանի կիլոմետր է, տասնյակ գնացքներ անընդհատ անցնում են երկաթգծերով, մեքենաների, պտտվող հողմաղաղացների և մյուս «ձայնավոր» մակետների հետ անկրկնելի եռուզեռ հաղորդում այգուն։
Հատկանշական է, որ «Մադուրոդամը», ինչպես ցանկացած հոլանդական քաղաք, ունի իր խորհուրդը և քաղաքապետը։ Փոքրիկ քաղաքի առաջին քաղաքագլուխ է նշանակվել արքայադուստր Բեատրիկսը (1952թ-ի հուլիսի 2)։
Մեր օրերում քաղաքապետի պաշտոնում նշանակվում է Հաագայի անչափահաս ուսանողներից մեկը, իսկ Հաագայի խորհրդի կազմում ընդգրկված է հաագացի 22 դպրոցական։
