ԵՐԵՎԱՆ, 20 դեկտեմբերի-Sputnik. Նախարար Ավետիս Կիտանյանն ի պաշտոնե պետք է զբաղվի Լիբանանի զբոսաշրջության զարգացմամբ։ Սակայն խոստովանեց` իր պաշտոնը ծառայեցնելու է նաև Հայաստան-Լիբանան հարաբերությունների խորացմանը։
«Լիբանանցի գործարարներ ու զբոսաշրջության ոլորտի ներկայացուցիչներ պետք է հրավիրել Հայաստան, ստիպել ներդրումներ անել և որպես արդյունք` զարգացնել հայաստանյան զբոսաշրջությունը։ Հայաստան-Լիբանան կամուրջ պետք է փորձենք ստեղծել»,-ասաց նա։
Ինչ վերաբերում է լիբանանյան զբոսաշրջությանը, ապա քաղաքացիական պատերազմից հետո այն քիչ-քիչ վերականգնվում է։ Կիտանյանի խոսքով` Լիբանանի կլիման բարենպաստ է զբոսաշրջության զարգացման համար։
«Լիբանանում հիմա ավելի մեղմ ու հանգիստ վիճակ է, զբոսաշրջիկների թիվն ավելացել է։ Եթե հիշում եք, արաբական որոշ երկրներից զբոսաշրջիկների մուտքը Լիբանան արգելված էր` որոշ քաղաքական անհասկացողության արդյունքում։ Հիմա վերանալու փուլում է այդ արգելքը»,-ասաց նա։
Չորեքշաբթի օրը` դեկտեմբերի 21-ին, տեղի կունենա նորանշանակ կառավարության առաջին նիստը։ Հենց այդ ժամանակ նախարարները մեկ առ մեկ կստանձնեն իրենց ոլորտները, և կմեկնարկեն աշխատանքները։
Իր աշխատանքը կստանձնի նաև ազգությամբ հայ մյուս նախարարը` Ժան Օղասաբյանը։ Նա զբաղվելու է Լիբանանում կանանց և տղամարդկանց իրավահավասարության հարցերով։
Կարծում է, որ Լիբանանում կանանց իրավունքների պաշտպանության խնդիր կա, նրանց իրավունքները հաճախ զիջում են տղամարդկանց իրավունքներին։
«Մեզ մոտ հավասարություն չկա կանանց ու տղամարդկանց միջև։ Տղամարդը կարող է հպատակություն /խմբ.-խնամակալություն/ տալ զավակներին, կինը չի կարող»,-ասաց նա։
Այս կառավարությունը ժամանակավոր է։ Ինչպես ասում է Օղասաբյանը` իրենց համար յուրահատուկ փորձաշրջան է, թե որքանով կարդարացնեն իրենց։
Ի դեպ, մինչ այս գերատեսչության ղեկավար նշանակվելը Ժան Օղասաբյանը եղել է Լիբանանի բարեկարգման նախարարը։
