ԵՐԵՎԱՆ, 19 դեկտեմբերի — Sputnik. Հայաստանյան մի շարք գյուղերում ատամնաբուժարաններ չկան, ինչի պատճառով «զարգացել է» ատամի հիգիենային չհետևելու ավանդույթը։ Իրավիճակը բարդ է, օրինակ, Արմավիրի մարզի Քարակերտում, Լեռնագոգում, Դալարիկում, Արգինայում, Մյասնիկյանում, Շենիկում։
Գյուղեր էլ կան, որտեղ դասավանդողների պակաս կա. երկու` միմյանցից տարբեր առարկա դասավանդում է մեկ ուսուցիչ։ Լոռու մարզի քահանաներից մեկը վերջերս Sputnik Արմենիայի հետ զրույցում հայտնեց, որ մարզի մի շարք դպրոցներում պատմության ուսուցիչը եկեղեցու պատմություն է դասավանդում։
ՀՀ զբաղվածության պետական գործակալության պետ Արտակ Մանգասարյանն ասուլիսի ընթացքում հաստատեց մեր տեղեկությունները։
«Մարզերում մշտապես առկա է նեղ մասնագիտություններով բժիշկների ու մանկավարժների պահանջարկ»,-ասաց նա։
Իսկ մայրաքաղաքում տեղեկատվական տեխնոլոգիաների և արդյունաբերության ոլորտի աշխատակիցների պահանջարկ կա։
Արտակ Մանգասարյանը վիճակագրական տվյալներ ներկայացրեց նաև գործազուրկների և աշխատանքի տեղավորվածների վերաբերյալ։
«2016 թվականի դեկտեմբերի 1-ի դրությամբ զբաղվածության կենտրոններում գրանցվել է 95 հազար 800 քաղաքացի, որոնցից 88 հազար 800-ը գործազուրկներ են»,-ասաց Մանգասարյանը։
Նախորդ տարվա նույն ժամանակահատվածի համեմատ աշխատանք փնտրողների թիվն աճել է 8.2 տոկոսով, իսկ բուն գործազուրկներինը` 5.6 տոկոսով։
Մանգասարյանն այս ցուցանիշը չի կապում աշխատատեղերի նվազման հետ։ Նրա խոսքով` աշխատանք փնտրողների թվի աճն ուղիղ համեմատական է զբաղվածության ոլորտում միջոցառումների ակտիվացման հետ։
«Պարզապես ավելի շատ մարդ է ընդգրկվել մեր ծրագրերում»,- հաստատեց նա։
Աշխատանք փնտրողների 23.6 տոկոսը կամ 19 հազար 100-ը երիտասարդներ են։ Աշխատանք փնտրող հաշմանդամներն էլ 2900-ն են։
«Տարվա ընթացքում աշխատանքի է տեղավորվել 15 հազար 592 մարդ։ Նրանցից 7927-ն ապահովվել է սեզոնային կամ ժամանակավոր աշխատանքով»,- ասաց Արտակ Մանգասարյանը։
Նա տեղեկացրեց, որ «Գործազուրկների աջակցության տրամադրում» ծրագիր է գործում։ Մանգասարյանի խոսքով` երիտասարդներն աշխատանքի տեղավորվելիս փորձառության խնդիր են ունենում։
Ծրագրում ընդգրկված երիտասարդներին 3 ամսով տեղավորում են աշխատանքի, փոխհատուցում նվազագույն աշխատավարձի 50 տոկոսի չափով, վճարում սոցիալական վճարները, աշխատավայրում պրակտիկայի ղեկավարին ևս փոխհատուցում են 20 տոկոսի չափով։ Գործում է ևս մի ծրագիր, որով գործազուրկների և աշխատանքից ազատման ռիսկ ունեցող, աշխատանք փնտրող անձանց համար մասնագիտական ուսուցում է կազմակերպվում։
