ԵՐԵՎԱՆ, 18 դեկտեմբերի — Sputnik. Իրավապահ մարմինների ուշադրության կենտրոնում է հայտնվել տեղեկությունն այն մասին, որ անհայտ անձինք որոշ ԶԼՄ-ների առաջարկել են գնել «Ֆորմուլա 1»-ի լեգենդար մրցարշավորդ Միխայել Շումախերի լուսանկարները: Այս մասին հայտնում է RTL-ը:
Դատախազությունն արդեն ստուգումներ է անցկացնում: Սա առաջին դեպքը չէ, երբ չարագործները փորձում են բացահայտել Շումախերի և նրա ընտանիքի անձնական կյանքը: ԶԼՄ-ների ներկայացուցիչները տարբեր ձևերով փորձել են սողոսկել նրա հիվանդասենյակ, նույնիսկ կարողացել են գողանալ նրա բժշկական թերթիկը:
Շումախերի հետ տեղի ունեցած դժբախտ պատահարից հետո դեռ ոչ մի լուսանկար չի հրապարակվել. մրցարշավորդի անձնական կյանքի գաղտնիությունը խստորեն պահպանվում է: Մարզիկի առողջական վիճակի մասին տեղեկություններն էլ կցկտուր են և հակասական: Շաբաթ օրը Շումախերի մենեջեր Սաբինա Քեմը հերթական անգամ ընդգծել է, որ օդաչուի առողջական վիճակը հանրային քննարկման թեմա չէ:
Գերմանացի չեմպիոնը գանգուղեղային վնասվածք էր ստացել 2013-ի դեկտեմբերին, ֆրանսիական Մերիբելում դահուկասահքի ժամանակ: Մրցարշավորդը գանգուղեղային վնասվածք էր ստացել՝ ուղեղի երկու կիսագնդերի բազմաթիվ վնասվածքներով և արյան զեղումով: 2014-ի սեպտեմբերից նա վերականգնողական կուրսեր է անցնում Շվեյցարիայի իր առանձնատանը:
Նյութի ռուսերեն տարբերակը
