ԵՐԵՎԱՆ, 18 դեկտեմբերի — Sputnik. «Grand Chess Tour» շարքի լոնդոնյան մրցաշարի եզրափակիչ փուլի արդյունքով՝ հայ գրոսմայստեր Լևոն Արոնյանը վեցերորդ և յոթերորդ տեղերը կիսեց նիդեռլանդցի շախմատիստ Անիշ Գիրիի հետ: Հաղթող ճանաչվեց ամերիկացի Ուեսլի Սոն, որը վերջին տուրից առաջ պահպանեց առաջատարի դիրքն ու ժամկետից շուտ դարձավ հաղթող:
Սոն շաբաթ օրը սև խաղաքարերով խաղաղ դաշինք կնքեց Ֆաբիանո Կարուանայի հետ, և խաղն ավարտվեց ոչ-ոքի արդյունքով: Ռուս գրոսմայստեր Վլադիմիր Կրամնիկը սպիտակներով ոչ-ոքի խաղաց հոլանդացի Անիշ Գիրիի հետ: Հիկարի Նակամուրա (ԱՄՆ) — Լևոն Արոնյան (Հայաստան) և Մաքսիմ Վաշյե-Լագրավ (Ֆրանսիա) — Մայքլ Ադամս (Անգլիա) պարտիաները նույնպես ավարտվեցին ոչ-ոքի հաշվով, իսկ Վիշվանաթան Անանդը (Հնդկաստան) պարտության մատնեց Վեսելին Տոպալովին (Բուլղարիա):
Եզրափակիչ տուրից առաջ Սոն հավաքեց 5,5 միավոր` 0,5 միավորով առաջ անցնելով Կարուանայից: Նրան հաջորդեցին Կրամնիկը, Անանդը, Նակամուրան (բոլորը` 4,5 միավոր), Արոյանը, Գիրին (երկուսն էլ` 4-ական միավոր), Վաշյե-Լագրավը, Ադամսը (երկուսն էլ` 3,5 միավոր), Տոպալովը (1 միավոր):
Grand Chess Tour-ի ընդհանուր ստուգատեսում, Լոնդոնի փուլից առաջ Սոն ուներ 30 միավոր, նրան հաջորդող նորվեգացի Մագնուս Կարլսենը, որը չէր մասնակցում Մեծ Բրիտանիայի մայրաքաղաքում անցկացվող մրցաշարին` 23 միավոր, Արոնյանը` 21,75 միավոր, Նակամուրան` 21,5 միավոր: Փուլում հաղթելու համար գրոսմայստերը ստանում է 13 միավոր, երկրորդ տեղի համար` 10 միավոր, երրորդ տեղի համար` 8: Այսպիսով, Լոնդոնի մրցաշարի փուլի ավարտից առաջ Սոն անհաղթահարելի մրցակից դարձավ մյուս մասնակիցների համար:
Նյութի ռուսերեն տարբերակը
