ԵՐԵՎԱՆ, 18 դեկտեմբերի — Sputnik, Լաուրա Սարգսյան. Տաղանդավոր հայ փոքրիկը ռուսական «Առաջին ալիքով» հեռարձակվող «Լավագույնը» շոուի՝ Հայաստանը ներկայացնող առաջին մասնակիցն է:
Հեռուստաշուի թողարկումներից մեկի ժամանակ ուրիշ հայ փոքրիկներ էլ են ելույթ ունեցել՝ Ալեքսանդր Բեյլերյանն ու Սոֆյա Բաղդասարյանը, որոնք բնակվում են Մոսկվայում:
Մերին հայտարարեց՝ «Ծովինար Հովհաննիսյան, «Էքսպրոմտ»», ու նուրբ մատները սահեցրեց քանոնի վրայով: Նա իր գեղեցիկ կատարումով հմայեց Մաքսիմ Գալկինին: Գալկինը, Մերիի կատարումից ոգևորված, որոշեց ինքն էլ քանոն նվագել, իսկ հետո խոսեց հայերեն:
«Ես իմ անուշ Հայաստանի արևահամ բառն եմ սիրում», — Եղիշե Չարենցի հայտնի բանաստեղծության այս տողն արտասանեց հաղորդավարը:
Մերին թեև դեռ 10 տարեկան է, բայց արդեն հասցրել է մի շարք երկրներում լինել` Ֆրանսիայից մինչև Ամերիկա: Երկու անգամ ելույթ է ունեցել Նյու Յորքի հայտնի «Քարնեգի հոլ» համերգասրահում:
Նա սովորում է հանրակրթական դպրոցի հինգերորդ դասարանում, իսկ քանոնի դասեր է ստանում Սպենդիարյանի անվան երաժշտական դպրոցում (պրոֆեսոր Ծովինար Հովհաննիսյանի դասարանում): Մերին երազում է, որ իր քանոնի ձայնը հնչի հոլիվուդյան բոլոր ֆիլմերում և քանոնը հայտնի գործիք դառնա ամբողջ աշխարհում:
Ընտանիքում նա առաջին երաժիշտն է, հարազատներից և բարեկամներից ոչ ոք պրոֆեսիոնալ երաժշտությամբ չի զբաղվել: Հայկական ազգային գործիքը միշտ սիրել է Մերիի մայրը` Անուշ Աղաջանյանը, որն էլ նրան տարել է երաժշտական դպրոց:
