ԵՐԵՎԱՆ, 17 դեկտեմբերի — Sputnik. Գոհար Սարգսյան. «ATV international» հեռուստաալիքը բացահայտ ադրբեջանական է: Թողարկվում է եվրոպական մի շարք երկրներում, այդ թվում՝ Իսպանիայում: Բարսելոնայում ապրող Գոհարը Sputnik Արմենիայի հետ զրույցում պատմեց, որ օրվա ընթացքում հեռարձակվում են հայալեզու հաղորդումներ, որոնց միջոցով սփյուռքահայերի շրջանում ցանկանում են ատելություն սերմանել հայկական իշխանությունների և բանակի հանդեպ: Ընդ որում, «սև» գործը կատարում են գրական, անթերի ու մատչելի հայերենով: Հիմնականում լուրերը հաղորդում է հայերեն վարժ խոսող մի կին, երբեմն էլ՝ մի տղամարդ:
«Հենց տեսնում ենք հայերեն բան են խոսում, ուզած-չուզած նայում ենք, հենց շատ ենք ջղայնանում, փոխում ենք ալիքը»,- պատմեց Գոհարը:
Թեև Գոհարի ընտանիքը նոր է գաղթել Իսպանիա, գիտեն հայկական իրականությունը, բայց օտարության մեջ նրանց գրավում է հայկական խոսքը: Համաձայն էլ չեն լինում, մի ականջով լսում են:
«Հայի նման են խոսում, կասկածում ես՝ խոսողը հա՞յ է, թե՞ ադրբեջանցի: Ամեն ինչ ներկայացնում են այնպես, ինչպես իրենց է ձեռնտու: Զարմանում ես, թե ամեն օրվա նորություններն ինչպես են այդքան արագ հաղորդում»,-ասաց Գոհարը:
Նա պատմեց նաև, որ այդ հեռուստաալիքն ավելի ակտիվ «աշխատում» էր ապրիլյան քառօրյա պատերազմի օրերին և «Սասնա ծռերի» գործողությունների ժամանակ: Կնոջ համար մինչև օրս հանելուկ է մնացել, թե ինչպես էին իրադարձություններն այդքան օպերատիվ լուսաբանում, կարծես մեկը լիներ, որ Հայաստանից տեղում լուրեր հաղորդեր:
«Իրենց Ալիևին են գովում, իսկ մեր ղեկավարին՝ փնովում, բայց մենք ամեն ինչ լավ գիտենք, չեմ կարծում, որ մեզ՝ հայերիս, վրա այդ հաղորդումները որևէ ազդեցություն կունենան: Պարզապես դեռ պատասխան չեմ գտնում, թե ում համար են հեռարձակում այդ հաղորդումները»,- ասաց նա:
Այն, որ Ադրբեջանում թիրախ են վերցրել հայկական սփյուռքը, պարզ է դառնում վերջին գործողություններից, որոնք պարբերաբար լուսաբանվում են մամուլում: Օրինակ՝ վերջերս ադրբեջանական haqqin.az կայքը գրել էր, թե Բաքու մեկնած Վահե Ավետյանին, Սյուզան Ջաղինյանին և Վահան Մարտիրոսյանին կմիանա նաև ոմն Արմեն Վիրաբյան:
Արմեն Վիրաբյան անունով երիտասարդը Գերմանիայից տեսաուղերձ տարածեց, որ չի պատրաստվում մեկնել Բաքու, և տարածվածն ապատեղակատվություն է: Նա Գերմանիա է մեկնել սովորելու, ոչ թե քաղաքական ապաստան խնդրելու: ArmLur կայքը զրուցել էր նրա եղբոր հետ: Վերջինս պատմել էր, որ եղբայրը հեռախոսազրույց է ունեցել այս պահին Բաքվում գտնվող, իրեն լրագրող ներկայացնող Սյուզան Ջաղինյանի հետ, դրանից հետո էլ տարածվել է այս ամբողջ պատմությունը: Իսկ այդ տիկնոջ հետ Վիրաբյանների ընտանիքը ժամանակին բարեկամական հարաբերություններ է ունեցել:
Տեսաուղերձում Արմեն Վիրաբյանը նշել է, որ խաբեբաների զոհ է դարձել և պատրաստվում է դատի տալ ադրբեջանական կայքին:
Որոշ մեկնաբանությունների համաձայն՝ Ադրբեջանը ցանկանում է սփյուռքում բնակվող հայերին «թակարդը» գցել՝ այդկերպ ներգրավելով նրանց Բաքու:
Տեղեկացնենք, որ Իսպանիայում հեռարձակվող ադրբեջանական ալիքի վերաբերյալ դիմեցինք ՀՀ ԱԳՆ մամուլի խոսնակ Տիգրան Բալայանին: Նա ասաց, որ Իսպանիայում այդ հեռուստաալիքը գրանցված չէ, իր տեղեկություններով՝ հայերն այնտեղ այդ հաղորդումները չեն դիտում:
