ԵՐԵՎԱՆ, 16 դեկտեմբերի — Sputnik. Իրազեկ և պաշտպանված սպառող» հասարակական կազմակերպությունն ուսումնասիրություն է իրականացրել կաթնամթերքի շուկայում և մի շարք խախտումներ բացահայտել:
Փորձաքննության արդյունքում խախտումներ են հայտնաբերվել «Աշտարակ կաթ» ՓԲԸ-ի արտադրած դասական կաթնաշոռում ու թթվասերում, «Արզնի կաթ» ՍՊԸ-ի արտադրած կաթում, կաթնաշոռում, սերով թթվասերում, «Բիոկաթ» ՍՊԸ-ի արտադրած կաթում, կաթնաշոռում ու թթվասերում, «Բոնիլատ» ՍՊԸ-ի արտադրած կաթում, կաթնաշոռում, թթվասերում, «Դուստր Մարիաննա» ՍՊԸ-ի արտադրած կաթնաշոռում, «Թամարա և Անի» ՍՊԸ-ի արտադրած կաթնաշոռում, «Մարիլա» ՍՊԸ-ի արտադրած կաթում, կաթնաշոռում, «Չանախ» ՍՊԸ-ի արտադրած կաթում, հատիկային կաթնաշոռում ու թթվասերում:
Հաշվի առնելով հայտնաբերված խախտումները՝ կազմակերպությունն զգուշացնում է, որ հիշյալ կաթնամթերքը կարող է վնասակար լինել առողջության համար և կոչ է անում սպառողներին խուսափել դրանց կիրառությունից, իսկ իրազեկողներին՝ իրացման ցանցից դուրս բերել խմբաքանակները:
Հիշեցնենք, սննդամթերքի անվտանգության պետական ծառայության իրականացրած ուսումնասիրության արդյունքում ևս կաթնամթերքի շուկայում բազմաթիվ խախտումներ էին հայտնաբերվել:
Հայտարարության մեջ, սակայն, չէր նշվում, թե կոնկրետ որ ընկերության որ արտադրատեսակում ինչպիսի խնդիրներ են հայտնաբերվել:
