ԵՐԵՎԱՆ, 16 դեկտեմբերի — Sputnik. Երևանի բոլոր վարչական շրջաններում տոնական լույսերը կվառվեն դեկտեմբերի 19-ին, իսկ գլխավոր տոնածառի լույսերը` նույն օրը, ժամը 19։00-ին։ Այս մասին լրագրողներին հայտնեց Երևանի փոխքաղաքապետ Արամ Սուքիասյանը։
Նրա խոսքով` այս տարի միջոցառումների մեծ մասը տեղի կունենա Ազատության հրապարակում, և միայն դեկտեմբերի 31-ի «Գալդ բարի, Նոր տարի» ծրագիրը կկայանա Հանրապետության հրապարակում` էստրադային երգիչների մասնակցությամբ։
«Կցանկանայի ընդգծել, որ այս տարի Երևանի բոլոր վարչական շրջաններում միջոցառումները տեղի կունենան բաց երկնքի տակ», — ասաց Սուքիասյանը։
Նա նշեց, որ Ազատության հրապարակում կկառուցվի հեքիաթային սառցե քաղաք։ Ամեն օր, սկսած դեկտեմբերի 26-ից (ժամը 16։00-ից), այդտեղ կիրականացվեն ծրագրեր` մուլտֆիլմերի հերոսների և հանդիսավարների մասնակցությամբ։
Նաև կտեղադրվեն հեքիաթային ամրոցներ, Ձմեռ պապի տնակը։ Հունվարի 5-ին երեխաներին սպասվում է հետաքրքիր ծրագիր` «Զվարճալի Ամանոր» անվանմամբ։
«Տոնական օրերին իրենց դռները կբացեն «Էրեբունի» պատմահնագիտական թանգարան-արգելոցը, Երևանի Պատմության թանգարանը, ինչպես նաև ժամանակակից արվեստի թանգարանը, ինչը կհետաքրքրի հատկապես զբոսաշրջիկներին», — ասաց փոխքաղաքապետը։
Նրա խոսքով` դա թույլ կտա մայրաքաղաքի հյուրերին գեղագիտական հաճույք ստանալ։
«Ինչ վերաբերում է սոցիալական ծրագրերին, ապա շուրջ 4000 երեխա կայցելի մեր թատրոնները, ևս 4000-ը, այդ թվում` մանկապարտեզների սաներ, կստանան քաղցրավենիքով պարկեր, իսկ 23000 անապահով ընտանիք, որպես օգնություն, կստանա նվերների տոնական փաթեթներ», — ասաց Սուքիասյանը։
Փոխքաղաքապետը հավելեց, որ Երևանի քաղաքապետարանը շուրջ 39 միլիոն դրամ է հատկացրել քաղաքը զարդարելու և տոնական միջոցառումները կազմակերպելու համար, ինչը 20 միլիոնով քիչ է անցած տարվա նախատեսածից։
Պատասխանելով Sputnik Արմենիայի հարցին, թե հույս կա արդյո՞ք, որ հաջորդ տարի երկրի գլխավոր տոնածառն ավելի գեղեցիկ ու նորաձև կլինի, փոխքաղաքապետը պատասխանեց, որ տոնածառ փոխելը «թանկ հաճույք է, որը կարժենա 30-35 միլիոն դրամ», ուստի ամեն տարի դիզայներները փորձում են փոխել տոնածառի արտաքին տեսքը` զարդարելով այն նոր խաղալիքներով, լույսերով և այլն։
Գալիք միջոցառումների ցուցակը քաղաքացիների համար հասանելի կլինի քաղաքապետարանի կայքում, Facebook սոցիալական ցանցի պաշտոնական էջում։
