ԵԱՀԿ Մինսկի խմբի համանախագահ երկրների ԱԳ նախարարների՝ Համբուրգում արած հայտարարությունը մեր երազանքների հայտարարությունը չէ, Sputnik Արմենիայի հետ զրույցում ասել է ԱԺ փոխխոսնակ Էդուարդ Շարմազանովը։
Ըստ նրա՝ ընդհանուր առմամբ, հայկական կողմին այն բավարարում է, որովհետև զետեղված են թեզեր, որոնք բխում են մեր սկզբունքներից:
«Դա և՛ հղումն է 1994-95 թվականների զինադադարի պահպանմանը, և՛ խնդրի բացառապես խաղաղ կարգավորմանը, և՛ Սանկտ Պետերբուրգի ու Վիեննայի գագաթաժողովների պայմանավորվածությունների իրականացմանը, ապրիլյան պատերազմի ժամանակ քաղաքացիական բնակչության նկատմամբ վայրագությունների դատապարտմանը»,- ասել է Շարմազանովը:
Նա կարծում է, որ համբուրգյան հայտարարությունը հայկական կողմի երազանքների հայտարարությունը կլիներ, եթե լիներ հասցեական, նշվեր Ադրբեջանի անունը։
