ԵՐԵՎԱՆ, 15 դեկտեմբերի — Sputnik, Լաուրա Սարգսյան. Հայտնի երգիչ, կոմպոզիտոր, հասարակական գործիչ Վահան Արծրունին հակաօրինական է համարում ԱԱԾ ներկայացուցիչների հետ զրույցը: Նրան Ազգային անվտանգության ծառայություն են հրավիրել դեկտեմբերի 12-ին, ասել են, որ ցանկանում են «զրուցել» և չորս հարցի պատասխան ստանալ:
«Զանգեցին բջջային հեռախոսիս: Ինչ-որ մեկը ներկայացավ որպես ԱԱԾ աշխատակից և հրավիրեց զրուցելու: Խոսակցությունն իմ քաղաքական համակրանքների ու հակակրանքների մասին էր, ամռանը Խորենացու փողոցում տեղի ունեցած դեպքերի մասին, ընդդիմության ներկայացուցիչների հետ ունեցած կապերի, իմ եկամուտների, բնակության վայրի ու ընտանիքիս անդամների մասին»,- ասաց Արծունին՝ ավելացնելով, որ դա «իր ընտանիքին ուղղված քողարկված սպառնալիք է»:
Նա խոստովանեց, որ մինչև հիմա իրեն՝ որպես ՀՀ քաղաքացու, անհանգստացնում է իր և իր ընտանիքի անվտանգությունը, քանի որ երկու օրվա ընթացքում խոսել է մի քանի փաստաբանի հետ, որոնք հաստատել են, որ հարցաքննության նման տարբերակը սահմանադրական իրավունքի խախտում է. Արծրունուն ԱԱԾ են հրավիրել առանց ծանուցագրի:
Նման հանդիպումներ իրականացնելու համար, նախևառաջ, ծանուցագիր են ուղարկում, որում նշվում է, թե ով է կանչում, ում, դատավարական ինչպիսի կարգավիճակով, այնուհետև հարցաքննության փաստը, ընթացքը և արդյունքներն արտացոլվում են արձանագրությունում:
«Իսկ իմ դեպքում այդ ամենը շրջանցվել է: Միայն ինձ զանգահարած հեռախոսահամարն ու ԱԱԾ տեսախցիկները կարող են ապացուցել, որ այդ հանդիպումը կայացել է, եթե ԱԱԾ-ն հերքի այն»,- ասաց Արծրունին:
ԱԱԾ-ում նա հարցրել է՝ այս հանդիպումն արդյոք Սահմանադրության խախտո՞ւմ չէ, նրան պատասխանել են, որ ամեն ինչ օրինական է և զրույցն ընդամենը 4 հարցի է վերաբերում: Սակայն Արծրունու համար մինչև հիմա էլ այս զրույցը որևէ բացատրություն չունի, քանի որ ինքը Խորենացու դեպքերին չի մասնակցել, իսկ ԱԱԾ-ն էլ չի զբաղվում այդ իրադարձությունների քննությամբ:
Արծրունին արդեն նամակ է հղել Մարդու իրավունքների պաշտպանին՝ խնդրելով պարզել իրավիճակը: Օմբուդսմենը նրա նամակին կպատասխանի դեկտեմբերի 19-ին: Անկախ այդ պատասխանի բնույթից, Արծրունին շարունակելու է պայքարել իր իրավունքների համար:
