Պարզվում է` օրենքը խախտվում է գրեթե ամեն քայլափոխի: Երեխաներին կրծքով կերակրման խրախուսման և մանկական սննդի շրջանառության մասին Sputnik Արմենիայի հետ զրույցում խոսում է «Վստահություն» առողջապահական կազմակերպության նախագահ Սուսաննա Հարությունյանը։
Սուսաննա Հարությունյանի խոսքով` առաջին անգամ Հայաստանում սահմանվել են կրծքով կերակրվող երեխայի և կրծքով կերակրող մոր իրավունքները։ «Այս օրենքով արգելվում է ազգաբնակչության շրջանում մանկական սննդի գովազդը։ Մինչդեռ, մանկական սնունդ արտադրող ընկերությունները իրենց կայքերում խոսում են կազմակերպած սեմինարների մասին, գովազդում են իրենց արտադրանքը։
Կայքերում նաև ներկայացված են մինչև 6 ամսական երեխաների հավելյալ սննդի տեսականի, որոնց նույնիսկ վաճառքն արգելված է ՀՀ-ում»,-իրենց մոնիտորինգի արդյունքներն է ներկայացնում Հարությունյանը։ Ի դեպ` մանկական սնունդը չպետք է վաճառվի նաև բուժհիմնարկներում գործող դեղատներում։ Այս ու նման խախտումների համար մեր օրենքը բավականին խիստ պատժամիջոցներ է սահմանում` աշխատավարձի երկուհարյուրապատիկից մինչև հինգհարյուրապատիկ։
