ԵՐԵՎԱՆ, 15 դեկտեմբերի — Sputnik. Երևանի պետական բժշկական համալսարանի թիվ մեկ լսարանի պատերը մեծ պատմություն են պարունակում, այնտեղ կարծես ամփոփված են բազմաթիվ հանճարեղ բժիշկների դասախոսությունները։ Այս անգամ այնտեղ հավաքված ուսանողները սպասում էին մի վիրաբույժի, որը ժամանել էր Հարավային Օսեթիայից։ Նա Հայաստան էր եկել 1988-ի երկրաշարժից հետո ու հայ բժիշկների հետ համատեղ բազում մարդկանց կյանք էր փրկել։
ԵՊԲՀ ռեկտոր Արմեն Մուրադյանը ներկայացրեց` դիմավորեք Կազբեկ Կուդզաևին։
Բժիշկը մեծ խանդավառությամբ մտավ լսարան ու իր տրամադրությամբ վարակեց ուսանողներին։ Առաջին իսկ բառերը հուսադրող էին.
«Չեմ եկել երկար-բարակ դասախոսություն կարդալու»։
Ասաց ու այդպես էլ արեց` մասնագիտական գործերն ու «արյունալի» լուսանկարները համեմելով հումորով։
«Ես Կուդզաև ազգանունը կրող առաջին բժիշկն եմ, ամբողջ ընտանիքս ինձ մոտ է բուժվում, իմ հաշվին, շատերը փոխել են ազգանունները, որ անվճար վիրահատվեն»,- լուրջ դեմքով ու ակնհայտ հումորով պատմեց պլաստիկ վիրաբույժը։
Կազբեկ Կուդզաևն այսօր հայրենիքում սեփական կլինիկա ունի, կատարում է արտաքին տեսքը շտկող վիրահատություններից մինչև բարդագույն վիրահատություններ։
«Բժշկությունն այն ոլորտը չէ, որտեղ կարելի է միլիոններ աշխատել»,- նախապես զգուշացրեց Կուդզաևն ու շարունակեց, որ այդ գործը մեծ նվիրում է պահանջում։
Ապագա բժիշկներին խորհուրդ տվեց` հիվանդին ընդունելիս պատկերացնել, որ դիմացդ հարազատդ է կանգնած. այդ դեպքում գործն ավելի արդյունավետ կլինի։ Հետո հիշեցրեց իր դասախոսության անվանումը` «Իմ հսկաները»։ Դա իր մեջ խորհուրդ է պարունակում, այն իմաստով, որ բժիշկը պետք է ականջալուր լինի իր ուսուցիչներին` կյանքի հսկաներին։
«Մի՛ լռեք, միշտ հարցրեք։ Եթե ձեր հարցից որևէ մեկը ծիծաղի, ուրեմն ձեր ուսուցիչը չէ»,-ասաց նա։
Հանդիպման ավարտին ուսանողներից շատերը խոստովանեցին` դրական լիցքերն այնքան ուժգին էին, իսկ դասախոսությունը` հագեցած, որ շտապելու են տուն ու անգիր անեն անատոմիայի դասագիրքը։
«Տպավորությունները ցնցող են, որովհետև մենք հանդիպել ենք մի մարդու, որն իր մի դասախոսությամբ կարողացավ ուսանողներին մեծ գործեր կատարելու մղել»,- ասաց ուսանողներից մեկը։
Իսկ ԵՊԲՀ Արմեն Մուրադյանը խոսքն ուղղեց ուսանողներին` իր հերթին նրանց ոգեշնչելով շատ աշխատել ու նպատակասլաց լինել։
«Բժշկական համալսարանի ուսանողը ոչ թե դատարկ անոթ է, որը պետք է լցնել, այլ ջահ, որը պետք է վառել»,-ասաց ռեկտորը։
Հանդիպմանը Կուդզաևին ուղեկցում էին ՀՀ ԱՆ գլխավոր վիրաբույժ Արտավազդ Սահակյանը և անվանի վնասվածքաբան-օրթոպեդ Արշակ Միրզոյանը։
