ԵՐԵՎԱՆ, 15 դեկտեմբերի — Sputnik. ՀՀԿ ԳՄ հերթական նիստում ներկուսակցական և նախընտրական հարցերի անդրադարձ չի եղել: Այս մասին նիստից հետո լրագրողներին հայտնեց ՀՀԿ մամուլի խոսնակ Էդուարդ Շարմազանովը: Նա նաև նշեց, որ կուսակցության նախագահի տեղակալների նշանակումները կլինեն ավելի ուշ, երբ կհրավիրվի ՀՀԿ խորհրդի նիստը:
«Մինչև տարեվերջ մենք խորհրդի նիստ կհրավիրենք, չեմ կարծում, որ անակնկալներ կլինեն: Կլինեն փոփոխություններ խորհրդում»,- ասաց ՀՀԿ խոսնակը` հիշեցնելով, որ կուսակցության խորհրդի նախագահի առաջին փոխնախագահի պաշտոնի հիմնական հավակնորդը, ինչպես նախօրոք հայտարարվել էր, վարչապետ Կարեն Կարապետյանն է:
Էդուարդ Շարմազանովը չբացառեց, որ առաջիկա ընտրություններին ՀՀԿ նախընտրական ցուցակում կլինեն բոլոր այն կուսակցությունների ներկայացուցիչները, որոնք մշտապես եղել են ՀՀԿ-ի կողքին և այսօր էլ ԱԺ ՀՀԿ խմբակցության անդամ են:
Լրագրողների հարցին ի պատասխան Էդուարդ Շարմազանովն անդրադարձավ Համբուրգում ԵԱՀԿ արտգործնախարարների հանդիպման ավարտին հրապարակված հայտարարությանը` նշելով, որ այն «մեր երազանքների հայտարարությունը չէ», բայց դրանում կան թեզեր, որոնք բխում են հայկական կողմի շահերից:
«Դա և՛ հղումն է 1994-95 թթ զինադադարի պահպանման համաձայնագրին, և՛ խնդրի բացառապես խաղաղ կարգավորմանը, և՛ Վիեննայի ու Սանկտ Պետերբուրգի գագաթնաժողովների պայմանավորվածությունների իրականացմանը, և՛ ապրիլյան պատերազմի ժամանակ խաղաղ բնակչության նկատմամբ վայրագությունների դատապարտմանը: Ընդհանուր առմամբ բավարարում է»,- ասաց Շարմազանովը` հավելելով, որ հայտարարությունը երազանքների հայտարարություն կլիներ, եթե պարունակեր հայկական կողմի ներկայացրած թեզերը, լիներ ուղիղ հասցեական ու դրանում տրվեր Ադրբեջանի անունը:
