ԵՐԵՎԱՆ, 14 դեկտեմբերի — Sputnik. Ալեքսանդր Բաունովն Facebook-ի իր էջում գրառում էր արել և հայտարարել, որ սիրիական բանակը, «չնայած ռուսական ավիացիայի աջակցությանը, Պալմիրան կրկին հանձնել է «Իսլամական պետության» սադիստներին»: Այս համատեքստում անտեղի հիշատակվել է RT հեռուստաալիքի գլխավոր խմբագիր Մարգարիտա Սիմոնյանի ազգությունը, ինչն օգտատերերի վրդովմունքի պատճառ է դարձել, հայտնում է RT-ն:
Բաունովի գրառումը հայտնվել է «Ազատություն» ռադիոկայանի նյութում, որն արտահայտում էր համացանցի օգտատերերի «չար վերաբերմունքը» «Պալմիրայում Ռուսաստանի պարտության» նկատմամբ:
«Միևնույնն է՝ հենց հիմա էլ որոշ մարդիկ շարունակում են պնդել, որ ամբողջ մարդկության համար գլխավոր վտանգ են հանդիսանում հայուհի Մարգարիտա Սիմոնյանը և Sputnik կայքը: Պետք է կենտրոնանալ նրանց վրա, պայքարել նրանց դեմ, հակազդել նրանց: Մինչև RT-ն չանջատեն (որի լսարանը շատ քիչ է զիջում Մեծ Բրիտանիայի գլխավոր ալիքին), աշխարհն անվտանգության մեջ չի լինի», — գրել է Բաունովը:
«RT հեռուստաընկերությունում, որն ավելի քան տասը տարի գլխավորում է Մարգարիտա Սիմոնյանը, շուրջ երկու հազար մարդ է աշխատում ավելի քան 40 երկրից: Նրանցից շատերը, այդ թվումч գլխավոր խմբագիրը, քաղաքական հետապնդումների են ենթարկվել էթնիկ պատկանելության համար: Առանց որևէ հիմքի հեռուստաընկերության աշխատակիցների ազգության մասին հիշատակելը կենցաղային ազգայնամոլության դրսևորում է, որը, ինչպես և ցանկացած էթնիկ անհանդուրժողականության դրսևորում, անթույլատրելի է քաղաքակիրթ հասարակության մեջ», — գրված է Քարնեգի կենտրոնին և «Ազատություն» ռադիոկայանի հեռարձակման հարցերի կառավարիչների խորհրդին (BBG) ուղղված նամակում:
Հատկապես վրդովեցնող է այն, որ նացիստական արտահայտությունը հնչել է Քարնեգի հիմնադրամի ստորաբաժանում հանդիսացող Քարնեգի մոսկովյան կենտրոնի գլխավոր խմբագրի անունից, քանի որ կենտրոնի հիմնական խնդիրը «երկրների համագործակցությանն աջակցելն է»:
Բաունովի արտահայտությունը մեկնաբանել է նաև Սիմոնյանը:
«Ամենից շատ ինձ զարմացնում են մարդիկ, որոնք չեն հասկանում (կամ ձևացնում են), որ դա նացիստական, ռասիստական արտահայտություն է: Նրանց ուզում եմ ասել` պարզապես պատկերացրեք, որ ռուսական պետական ԶԼՄ-ները գրեին «հրեա Ալեքսեյ Վենեդիկտովը» կամ դրա նման մի բան: Պատկերացնու՞մ եք, թե ինչ աղմուկ կբարձրանար: Այդ ԶԼՄ-ի գլխավոր խմբագրի համար կփակեին մուտքը բոլոր նորմալ երկրներ, պատժամիջոցներ կկիրառեին և այլն: Իսկ այստեղ` դե ի՞նչ է եղել որ: Առանձնապես ոչինչ… Պարզապես ամերիկյան պետական լրատվամիջոցը հրապարակում է մի բան, որն Ամերիկայում նույնիսկ դժվար է պատկերացնել», — ասել է նա:
