ԵՐԵՎԱՆ, 14 դեկտեմբերի — Sputnik. Ռուսաստանի պետդուման վավերացրել է «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը։
Մոսկվայում 2015թ-ի դեկտեմբերի 23-ին ստորագրված փաստաթուղթը պալատի քննարկմանն էր ներկայացրել ՌԴ նախագահը։
«Համաձայնագրով նախատեսվում է հակաօդային պաշտպանության միավորված տարածաշրջանային համակարգ ստեղծել` որպես ԱՊՀ անդամ երկրների միավորված ՀՕՊ համակարգի բաղադրիչ», — ասվում է օրինագծին կից բացատրական փաստաթղթում։
Խաղաղ ժամանակ Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգի վրա դրվում են այնպիսի խնդիրներ, ինչպիսիք են տարածաշրջանում հակաօդային պաշտպանության մարտական հերթապահության կազմակերպումը և իրականացումը, հակաօդային պաշտպանության միավորված տարածաշրջանային համակարգի զորքերի (ուժերի) մարտական կառավարման համակարգը, ինչպես նաև սպառազինությունն ու ռազմական տեխնիկան կիրառման համար մշտապես պատրաստվածության մեջ պահելը, հակաօդային պաշտպանության տարածաշրջանային համակարգերի կազմի մեջ մտնող այլ զորքերի (ուժերի) հետ փոխգործակցությունը:
Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգի զորքերի (ուժերի) ու հակաօդային պաշտպանության այլ տարածաշրջանային համակարգերի կազմի մեջ մտնող զորքերի (ուժերի) համատեղ գործողությունների համակարգումն իրականացնում է Ռուսաստանի Դաշնության զինված ուժերի օդատիեզերական ուժերի գլխավոր հրամանատարը, իսկ ընդհանուր ղեկավարումը` Ռուսաստանի Դաշնության Հարավային զինվորական օկրուգի զորքերի հրամանատարը։
Ենթադրվում է, որ Ռուսաստանի և Հայաստանի պաշտպանության նախարարությունները խաղաղ ժամանակ կկազմակերպեն ՀՕՊ միավորված տարածաշրջանային համակարգի զորքերի կիրառման պլանավորումը, նրանց համատեղ հերթապահությունը, փոխգործակցությունը, ինչպես նաև համատեղ օպերատիվ և մարտական նախապատրաստությունը։
Նյութի ռուսերեն տարբերակը
