ԵՐԵՎԱՆ, 14 դեկտեմբերի — Sputnik. Պաշտպանի հանձնարարությամբ Արագ արձագանքման խումբն այց է կատարել «Նուբարաշեն» քրեակատարողական հիմնարկ, ուսումնասիրել Արթուր Սարգսյանի վերաբերյալ բժշկական փաստաթղթերը, ինչպես նաև առանձնազրույց ունեցել նրա հետ:
Բողոքում բարձրացված հարցերի և այցելության ընթացքում ձեռք բերված տեղեկությունների համապարփակ ուսումնասիրությունից հետո անհրաժեշտություն է առաջացել կրկնակի այց կատարել՝ այցելություն իրականացնող խմբում ներգրավվելով Մարդու իրավունքների պաշտպանի աշխատակազմի Խոշտանգումների և վատ վերաբերմունքի կանխարգելման վարչության բժիշկ մասնագետին:
Դեկտեմբերի 13-ին կատարված կրկնակի այցելության արդյունքներն ամփոփելով` Մարդու իրավունքների պաշտպանի կողմից որոշում է կայացվել Ա. Սարգսյանի փաստաբանի բողոքը քննարկման ընդունելու մասին:
Արդարադատության նախարարությունից պահանջվել են պարզաբանումներ՝ կապված Արթուր Սարգսյանին անհրաժեշտ բուժօգնության ապահովման հետ:
Նշենք, որ ավելի վաղ «Նուբարաշեն» ՔԿՀ-ն պարզաբանում է տարածել «հաց բերող» Արթուր Սարգսյանի առողջական վիճակի վերաբերյալ:
Նյութի ռուսերեն տարբերակը
