Աստղաբան-էզոթերիկ Գուրգեն Հովհաննիսյանը Sputnik Արմենիային տված հարցազրույցում ներկայացրեց 2017 թվականին սպասվող հետաքրքիր մանրամասները։ Նա նշեց նաև այն նշանները, որոնք 365 օր շարունակ կազդեն տարվա իրադարձությունների վրա։ Զրուցել է Անի Լիպարիտյանը։
- Պարոն Հովհաննիսյա՛ն, պատմեք, խնդրում եմ, գալիք 2017 թվականի մասին։
— Այս տարին ասոցացվում է կարևոր խորհրդանիշ Փյունիկ թռչունի հետ, որն այրում է իրեն, սակայն կրկին վերածնվում է մոխրից։ Իսկ դա նշանակում է` վերականգնում, նոր էներգիա, ոչնչից նորի ստեղծում։
2017 թվականին անկանխատեսելի իրադարձություններ են տեղի ունենալու, քանի որ սպասվող տարին ինքնին այդպիսինն է։ Այդ գործընթացին օգնում է նաև Վեներան։ Այս հետաքրքիր մոլորակը բոլորին հակառակ է գնում։ Բոլոր մոլորակների համար ուղղությունը նույնն է, իսկ Վեներայի համար` ոչ։ Հենց այդ պատճառով էլ մեր կյանքում անակնկալների տարափ է լինելու։
- Ի՞նչ են կանխատեսում աստղագուշակները Հրե աքաղաղի տարում։ Կենդանակերպի ո՞ր նշանների համար այն առավել հաջողակ կլինի։
— Մենք տարին մեկ անգամ կարող ենք խոսել ընդհանրացված կենդանակերպի բոլոր նշանների մասին, այն մասին, թե ինչ է նրանց սպասվում և այլն։ Ես ցանկանում եմ նշել, որ ամեն անգամ նշաններին իմպուլսներ են հաղորդվում` իրենց անհատական աճի համար, որպեսզի յուրաքանչյուր նշան բացառիկ հնարավորություն ունենա սեփական կյանքը կերտելու և այն ավելի լավը դարձնելու համար։
Սակայն կան նշաններ, որոնք ավելի հաջողակ կլինեն, և ավելի մեծ հնարավորություններ կունենան 2017 թվականին, քան մյուսները։ Դա չի նշանակում, որ մյուսների համար տարին վատը կլինի, իսկ այդ կենդանակերպի նշանների համար` լավը։ Այս տարի իշխանությունը, կարելի է ասել, Ցուլերին, Կշեռքներին և Այծեղջյուրներին է պատկանում։ Այս երեք կենդանակերպները կգերիշխեն և կազդեն 2017 թվականի իրադարձությունների ընթացքի վրա։
Ցուլն ակտիվ ազդեցություն կունենա ֆինանսական գործողությունների, փողի և սոցիումի հետ կապված բոլոր գործընթացների վրա։ Երկրի ամուր տարերքը կօգնի Ցուլին կարգավորել նյութական և այլ կարևոր հարցերը։
Կշեռքն անկանխատեսելի նշան է։ Կշեռքները կարող են կտրուկ փոխել իրենց ուղղությունը Վեներայի ազդեցության տակ։ Այդ նշանը ակտիվ կլինի հոգևոր մակարդակում։ 2017 թվականին մշակույթի, արվեստի հարցերը կշեռքներն իրենց ձեռքը կվերցնեն և դրական փոփոխություններ կկատարեն։
Այծեղջյուրը կապված է կենդանակերպի տասներորդ նշանի հետ, իսկ տասներորդ նշանը արևելյան օրացույցով Աքաղաղն է, որը թույլ է տալիս զուգահեռներ անցկացնել։ Այդ նշանը գլոբալ իմաստով հենք է ստեղծելու։ Ի տարբերություն Կշեռքների, որոնք օդային են, Այծեղջյուրը` երկրային նշան է։
Այդ պատճառով այս կենդանակերպի ներկայացուցիչները ամեն ինչ անելու և ճշտելու են վայրկյաններով։ Այծեղջյուրը կապված է ժամանակի` Քրոնոսի հետ (ժամանակի աստված), քանի որ այն գտնվում է Սատուրնի հովանու ներքո։ Այս արդիական նշանը պահանջկոտ է ինչպես իր, այնպես էլ ուրիշների նկատմամբ։ Այս գիծն այծեղջյուրների մոտ միշտ պահպանվում է` անկախ իրավիճակից ։
2017 թվականին Այծեղջյուրն իրեն դրսևորելու է որպես Ամալֆեյա (հին հունական դիցաբանության մեջ` լեգենդար այծ, որն իր կաթով կերակրել է Զևսի երեխային — խմբ.)։ Նա լինելու է անսահման շռայլ և մեծահոգի։
- Իսկ դուք ինքներդ հավատու՞մ եք հորոսկոպին։ Կարդու՞մ եք այն։
— Գիտեք, սա կրոն չէ, որ հավատաս կամ ոչ։ Դուք հավատու՞մ եք քիմիային։ Նման հարց Ձեզ մոտ չի՞ առաջանում, չէ՞։
Աստղաբանությունը միշտ խոսում է հնարավորությունների և դրանք օգտագործելու մասին։ Այս գիտությունը միշտ հուշում է, երբ ինչ անել, ինչպես և ինչու։
Աստղաբանությունը հուշում է, թե ինչ տաղանդ և հնարավորություն ունենք մենք, և ինչը կարող է մեզ խանգարել։
Աստղաբանությունը որևէ բան չի պարտադրում։ Ի դեպ, սա այն կարևոր գիտություններից է, որը հակասում է սնահավատությանը։
