ԵՐԵՎԱՆ, 13 դեկտեմբերի — Sputnik. Ինչու՞ կառավարությունը նոր ժամկետ չի սահմանում 27 տարին լրացած և Հայաստանում չգտնվող այն քաղաքացիների համար, որոնք գործող օրենքով կարող են վճարել շուրջ 14.8 մլն դրամ և ազատվել զինծառայությունից խուսափելու համար իրենց նկատմամբ հայտարարված հետախուզումից:
Նախարար Վիգեն Սարգսյանը, սակայն, պատգամավորի լիրիկական տրամադրությունը չկիսեց` նշելով, որ խոսքը զինծառայությունից խուսափածների մասին է, որոնք տարիներ շարունակ չեն մտածել Հայաստան գալու մասին և միայն 27 տարին լրանալուց հետո են նման ցանկություն ունենում:
«Մարդիկ տարբեր պատճառներով մինչև 27 տարեկանը չեն ծառայում զինված ուժերում, այնուհետև չգիտես ինչու նրանց համար շատ կարևոր է դառնում Հայաստան վերադառնալը»,- ասաց նախարարը:
Այս հարցում Սարգսյանի հետ չհամաձայնեց պատգամավոր Տիգրան Ուրիխանյանը` նշելով, որ անձամբ ճանաչում է ԱՊՀ երկրներում բնակվող երիտասարդների, որոնք ոչ թե խուսափել են զինվորական ծառայությունից, այլ Հայաստանից հեռացել են մանուկ հասակում, ծնողների հետ, սոցիալական պայմաններից դրդված և այժմ ցանկանում են վերադառնալ Հայաստան:
«Նրանց տարիքը լրացել է, ինչ-ինչ պատճառներից ելնելով, միգուցե հայրենասիրությունից, միգուցե գործնական հարցերով ցանկանում են վերադառնալ Հայաստան»,-ասաց նա:
Այդուհանդերձ, Վիգեն Սարգսյանը նշեց, որ օրենքի ժամկետի երկարաձգումը ոչ թե իր ղեկավարած գերատեսչության, այլ Սփյուռքի նախարարության իրավասությունն է: Երբ այդ առաջարկը կառավարությունում կլինի, իրենք կհայտնեն իրենց տեսակետը: Ի դեպ, գործող օրենքն այժմ տարածվում է այն անձանց վրա, որոնց 27 տարին լրացել է 2015թ-ին:
