ԵՐԵՎԱՆ, 12 դեկտեմբերի – Sputnik. Նախօրեին Ղրղըզստանում սահմանադրական փոփոխությունների և խորհրդարանի ընտրությունների վերաբերյալ հանրաքվե է անցկացվել։ ԱՊՀ միջխորհրդարանական վեհաժողովի դիտորդական առաքելությունը գլխավորել է ՀՀ ԱԺ փոխխոսնակ Էդուարդ Շարմազանովը։
Sputnik Ղրղըզստանին տված հարցազրույցում Չիլինգարյանը հայտնել է, որ խմբում 24 դիտորդ է եղել։
«Դիտորդները մի քանի ընտրատեղամասում են եղել և հետևել են բացման գործընթացին։ Այն ընտրատեղամասում, որտեղ ես ու հանձնաժողովի ղեկավար Շարմազանովն ենք եղել, ամեն ինչ ժամանակին կատարվեց, և շատ հաճելի էր, որ հնչում էր Ղրղըզստանի օրհներգը։ Ընտրողների և դիտորդների նկատմամբ վերաբերմունքը բարյացակամ էր», — ասել է Չիլինգարյանը։
Նրա խոսքով` ուշադիր հետևել է էլեկտրոնային քվեատուփերի աշխատանքին և ընտրողների կենսաչափական նույնականացման գործընթացին։
«Նման համակարգը նվազեցնում է մարդկանց մասնակցությունը… Բացման ժամանակ և հետո մենք որևէ խախտում չենք տեսել», — ավելացրել է քաղաքական գործիչը։
Նրա խոսքով` միայն տեխնիկական բնույթի խնդիրներ են եղել։
«Քվեարկության ժամանակ տեխնիկական խնդիրներ առաջացան` չէր աշխատում էլեկտրական վարդակը։ Սակայն անսարքություններն արագ վերացրին, և ընտրական գործընթացը շարունակվեց», — ասել է Հայաստանի ներկայացուցիչը։
Չիլինգարյանն ընդգծել է, որ առաջին անգամ է հետևել էլեկտրոնային քվեարկության գործընթացին։
«Էլեկտրոնային քվեատուփերը «չեն ընդունում» ո՛չ ազգակցական կապերը, ո՛չ էլ որևէ այլ գործոն։ Ինձ շատ դուր եկավ։ Միակ թերությունը տեխնիկական անսարքությունների հնարավորությունն է, բայց դա էլ լուծվող հարց է», — ասել է դիտորդը։
Ըստ նրա` Հայաստանը հաճույքով կօգտագործի Ղրղըզստանի փորձը։
