ԵՐԵՎԱՆ, 12 դեկտեմբերի — Sputnik. Հայտնի հնագետ Բորիս Պիոտրովսկու կիսանդրին, որը տեղադրվեց Զաքյան փողոցում, դարձավ ոչ միայն այդ տան, այլև ամբողջ Երևանի մի մասը։ Այս մասին բացման արարողության ժամանակ ասաց նրա որդին` խորհրդային և ռուս պատմաբան-արևելագետ, արաբագետ, իսլամագետ, Պետական Էրմիտաժի գլխավոր տնօրեն Միխայիլ Պիոտրովսկին։
Նրա խոսքով` երբ ստեղծում էին կիսանդրին, հեղինակներն ամբողջ ժամանակ կենտրոնացած էին Բորիս Պիոտրովսկու դիմագծերը ճիշտ կերտելու վրա։
«Հնագետի դիմանկարը նկարած Մարտիրոս Սարյանն անգամ չէր հավանում իր աշխատանքն, ասում էր` այդքան էլ լավ չի ստացվել։ Լուսանկարը լավն է, սակայն այն պատկերելը դժվար է։ Ամեն ինչ շատ լավ է ստացվել, և դա շատ կարևոր է, քանի որ կիսանդրին Երևանի այս հատվածի և այս տան մի մասն է։ Հիշում եմ` այստեղ շատ հրաշալի տներ կային, այստեղ հին Երևանն էր, քաղաքի պատմությունը, բակում հավաքվում էին հնագետներն ու մայրաքաղաքի մտավորականները», — հիշեց Պիոտրովսկին։
Էրմիտաժի ղեկավարի խոսքով` այստեղ նրա հայրը նարդի էր խաղում հայտնի վիմագրագետ Սեդրակ Բարխուդարյանի հետ, իսկ հոր բանասեր ընկերներից մեկն իրեն «հին բաղնիքի Մխո» էր անվանում, քանի որ հենց այս փողոցում էր գտնվում հին բաղնիքը։«Ես շատ ուրախ եմ, որ բացվել է իմ հոր, հայտնի գիտնական Բորիս Պիոտրովսկու հուշատախտակը։
Այս հուշատախտակը ոչ միայն հարգանքի տուրք է նրան, սա հայ-ռուսական մշակութային կապերի հրաշալի պատմության հուշարձանն է։ Իսկ այդ կապերը խորհրդանշում է նաև Բորիս Բորիսովիչին, նաև այն տունը, որը նախկինում կանգնած էր այս տեղում», — նշեց նա։
Պիոտրովսկու խոսքով` սա Երևանի և Սանկտ Պետերբուրգի մտավոր բարձր մակարդակի վկայությունն է։
«Սա երկու հրաշալի քաղաքների կապի խորհրդանիշն է։ Մեր բարեկամությունը երկար պատմություն ունի, բայց կան նաև շփման նոր հնարավորություններ, որոնք հիմա քննարկման փուլում են։ Հուսով եմ, որ մեր հարաբերությունները նոր ուղղություններ կստանան, որը կրկին կապված կլինի պատմության ուսումնասիրման հետ։ Վաղը մենք նոր համաձայնագիր կստորագրենք: Այնտեղ Էրմիտաժին վերաբերող մաս կա, ուր կան «Ուրարտուի» և միջնադարյան Հայաստանի մասին պատմող հրաշալի դահլիճներ, և ոչ միայն», — ասաց նա։
Պատասխանելով Sputnik Արմենիայի այն հարցին, թե նրա` որպես հայկական արմատներ ունեցող մարդու համար, որքանով է կարևոր Հայաստանում իրականացվող պեղումները, Պիոտրովսկին ասաց. «դրանք կարևոր են ոչ միայն ինձ համար»։
«Դրանք կարևոր են ողջ մարդկության համար։ Հայաստանն աշխարհի հնագույն և մեծագույն երկրներից է: Զարմանալի է, որ հայկական հողում այսքան հուշարձաններ կան ու անընդհատ նորերն են հայտնվում», — ասաց Երևանի հյուրը։
Գիտնականի որդին նշեց, որ վերջերս Էրմիտաժում կայացել է «Արարատի ստորոտում» ցուցահանդեսը, որն ամբողջությամբ բաղկացած էր Բորիս Բորիսովիչին հաջորդած սերնդի պեղած գտածոներից։ Պիոտրովսկու խոսքով` մոտ ապագայում դեռ սպասվում են Ուրարտուին նվիրված լավ ցուցադրություններ։
Կիսանդրու բացման արարողությանը ներկա էին Երևանի քաղաքապետ Տարոն Մարգարյանը, մայրաքաղաքի ադմինիստրացիայի աշխատակիցները, Հայաստանում ՌԴ դեսպան Իվան Վոլինկինը, կիսանդրու քանդակագործ Տիգրան Մուրադյանը։
