«Մանչեսթեր Յունայթեդ»-«Տոտենհեմ» հանդիպման ժամանակ Հենրիխ Մխիթարյանը դարձավ հրաշալի գոլի հեղինակ, որը մանկունյանցիների համար հաղթական դարձավ: Բայց հայ ֆուտբոլիստը հանդիպման 81-րդ րոպեին Դենի Ռոուզի հետ գնդակի համար պայքարում վնասվածք ստացավ ու պատգարակի օգնությամբ թողեց խաղադաշտը:
Պարզ է, որ Հենրիխի փոխարինումից հետո մեր բոլորի ուշադրությունը սևեռվեց համացանցի ուղղությամբ, քանի որ այնտեղ կարելի էր նորություններ գտնել Հենրիխի վնասվածքի լրջության մասին: Խաղային դրվագում շատ լավ երևաց, որ մեր ֆուտբոլիստի ոտնաթաթն էր վնասվել: Ի ուրախություն բոլորիս պարզվեց, որ վնասվածքը լուրջ չէ, և Մխիթարյանը կկարողանա խաղադաշտ դուրս գալ առավելագույնը երկու շաբաթ հետո: Հիմա արդեն Ժոզե Մոուրինյոն նման իրավիճակներում խնայելու է հայ ֆուտբոլիստին, շատ լավ հասկանալով, որ Հենրիխն իր արագությամբ, փոխանցումների կուլտուրայով, խաղադաշտը տեսնելու ունակությամբ ու վերջապես դիպուկ հարվածների միջոցով դարձել է «Յունայթեդի» առաջատար խաղացողներից մեկը:
Մխիթարյանը ՈւԵՖԱ-ի Եվրոպայի լիգայում «Զարյայի» դարպասը գրավելուց հետո հայտարարել էր, որ հաջորդ գնդակը լինելու է Օլդ Տրաֆորդում: Հայ ֆուտբոլիստը չդրժեց իր խոստումն ու անմիջապես հաջորդ խաղում բացեց իր խփած գնդակների հաշիվը Երազանքների թատրոնում («Օլդ Տրաֆորդ» մարզադաշտի մեկ այլ անվանումը): Ի դեպ, Մխիթարյանը հայաստանցի առաջին ֆուտբոլիստն է, որն աչքի է ընկնում Օլդ Տրաֆորդում: Իսկ նրանից առաջ հայ ֆուտբոլիստներից Պրեմիեր լիգայում գոլի հեղինակ են դարձել Յուրի Ջորկաեֆը (2002 թվականին) և Անդրանիկ Թեյմուրյանը (2007թվականին): Ընդ որում, և՛ Ջորկաեֆը և՛ Թեյմուրյանը գոլ են հեղինակել «Բոլտոնի» կազմում:
Այժմ անգլիական լրատվամիջոցներն անընդհատ խոսում են Մխիթարյանի մասին: Հերթական խաղում հայ ֆուտբոլիստը ճանաչվեց խաղի լավագույն խաղացող: Առաջնության մեկնարկում, երբ Մխիթարյանը խաղային ժամանակ չէր ստանում, հայ ֆուտբոլասերը սպասման մեջ էր ու դժգոհում էր Մոուրինյոյից: Սակայն պորտուգալացի մասնագետը դադար էր վերցրել Մխիթարյանին խաղադաշտ դուրս բերելու գործում մանչեսթերյան դերբիում մեր ֆուտբոլիստի անհաջող խաղից հետո: Իհարկե, կար նաև վնասվածքը, բայց Մոուրինյոն աստիճանաբար մոտեցրեց Հենրիխին այն իրավիճակին, որը հիմա մենք տեսնում ենք խաղադաշտում: Հոգեբանությունն ու վստահությունը բարձրակարգ ֆուտբոլիստի համար շատ կարևոր գործոններ են, և այդ առումով Մխիթարյանի մոտ հիմա ամեն ինչ նորմալ է:
Բունդեսլիգայում հրաշալի մրցաշրջան անցկացնելուց հետո Հենրիխն Անգլիայի խաղադաշտերում ու առաջնությանը հարմարվելու խնդիր, իհարկե, ուներ: Սակայն Մոուրինյոն այդ ամենի հանդեպ ունեցած իր մոտեցմանը նաև ինտրիգ ավելացրեց: Հայ ֆուտբոլիստի մոտ, իհարկե, մեծ ցանկություն առաջացավ բոլորին ապացուցելու, որ ինքը բարձրակարգ ֆուտբոլիստ է: Ու հաշվի առնելով Մխիթարյանի աշխատասիրությունն ու մեծ նվիրումը իր գործին` ստացվեց, որ թիմի մեկնարկային կազմում տեղ գտնելը ժամանակի հարց էր:
«Տոտենհեմի» հետ խաղից հետո Մխիթարյանին արդեն համեմատում են Մեսութ Օզիլի կամ Ֆիլիպե Կոուտինյոյի հետ: Սա արդեն շատ լուրջ է, որովհետև վերջին երկուսն էլ իրենց թիմերում՝ Արսենալում և Լիվերպուլում խաղի կառուցման հարցում առաջին ջութակ են համարվում: Հուսանք, որ հայկական մեղեդին Մխիթարյանի խաղով երկար կհնչի անգլիական խաղադաշտերում: Հայ ֆուտբոլիստն իսկապես հանճարեղ է իր կատարմամբ խաղադաշտում: Թվում է, որ միակ խանգարող գործոնը վնասվածքն է, դա էլ ֆուտբոլի անբաժանելի մասնիկներից մեկն է: Բայց ժողովրդական լեզվով ասած` «ինչքան հեռու, այնքան լավ»:
Մոուրինյոն ու երկրպագուները հիմա արդեն սպասում են boxing days կոչված ժամանակահատվածին, որի ընթացքում անգլիացիները նվերներ են մատուցում իրար: Մենք էլ սպասենք Հենրիխի նոր նվերներին` խփված գնդակների ու հիանալի խաղի տեսքով: Առողջություն Հենրիխին:
