ԵՐԵՎԱՆ, 12 դեկտեմբերի — Sputnik. Պաշտպանության նախարար Վիգեն Սարգսյանը հայտարարեց, որ, չնայած բուռն քննարկումներին, նախագիծը երկրորդ ընթերցմամբ էլ կներկայացվի` պահպանելով պարտադիր բաղադրիչը: Ըստ նախարարի` պարտադիր բաղադրիչը պահպանվել է` մանրակրկիտ ուսումնասիրելով «Մարտիկ» հիմնադրամի տարբերակը։ Փորձը ցույց է տվել, որ եթե սկզբնական շրջանում հիմնադրամի նկատմամբ կար հասարակության վստահությունը, վերջում արդեն այն խաթարվեց:
Վիգեն Սարգսյանն ասաց, որ «Մարտիկ» հիմնադրամի գործառույթի շրջանակներում, բուն գործունեության ընթացքում, կամավոր սկզբունքով հաջողվել է հավաքել մոտ 1,2 մլրդ դրամ, որը ներկայիս նախագծով նախատեսածից մի քանի անգամ պակաս է:
«Այսինքն, երբ անվստահության խնդիր չկար, նվիրատուների թիվն ամենադինամիկ շրջանում չի անցել մոտ 7000 —8000»,-ասաց նախարարը:
Նախարարը շտապեց փարատել «Մարտիկ» հիմնադրամի գումարների ճակատագրով անհանգստացնողներին.«Այդ գումարներն անձեռնմխելի են, ինչպես կանոնադրությամբ գոյություն ունեն: Մայր գումարից ստացվող տոկոսները, հիմնադրամի հոգաբարձուների որոշմամբ, ծախսվել են կանոնադրական նպատակների համար»,-ասաց պաշտպանության նախարարը:
Հանձնաժողովի անդամ, անկախ պատգամավոր Խաչատուր Քոքոբելյանը նշեց, որ չնայած օրենսդրական նախաձեռնության անհրաժեշտությանը, նախագծում բացեր կան:
«Շարունակում եմ մնալ այն կարծիքին, որ պետք է կամավորական սկզբունքը գործի, իսկ նվազագույն աշխատավարձ ունեցողներից ընդհանրապես չգանձեն: Համակարծիք եմ, որ 200 հազարից ավելի աշխատավարձ ստացողներից ավելի գանձվի»,-ասաց նա:
Նախարար Սարգսյանը նշեց, որ, հաշվի առնելով եղած փորձը և մեր առջև դրված խնդիրը և, քանի որ խոսքը մարտական հերթապահության զինծառայողների սոցիալական պաշտպանվածության վիճակի բարելավման մասին է, նպատակահարմար է պահպանել մոտեցումները, որ կան օրենքի նախագծում` պարտադիր վճարը պահպանելով որպես հիմք՝ հնարավորություն ստեղծել կամավոր լրացուցիչ վճարումներով ավելացնել այդ հիմնադրամի միջոցների ծավալը:
