ԵՐԵՎԱՆ, 9 դեկտեմբերի — Sputnik, Լաուրա Սարգսյան. «Արմենիա» ավիաընկերությունն ուղևորներին առաջարկում է Երևան-Մոսկվա չվերթի նոր սակագին`29 եվրո։ Այս սակագնային քաղաքականությունը կգործի դեկտեմբերի 24-31-ը։
«Ավիաընկերության ղեկավարությունը որոշել է նվեր անել ուղևորներին և տոմսի համար սահմանել 29 եվրո կամ 15 000 դրամ սակագին։ Միաժամանակ, տոմսի արժեքի մեջ մտնում է ինչպես ուղեբեռն, այնպես էլ սնունդը», — Sputnik Արմենիայի թղթակցի հետ զրույցում ասաց «Արմենիա» ավիաընկերության հասարակայնության հետ կապերի բաժնի ղեկավարի տեղակալ Գևորգ Խաչատրյանը։
29 եվրո սակագինը ներառում է նաև «Զվարթնոց» օդանավակայանի հարկերը։
Երևանից Մոսկվա առաջին չվերթը «Արմենիան» իրականացրել է 2016թ-ի օգոստոսի 1-ին։ Աշնանն այդ ուղղությամբ թռիչքները դադարեցվել էին, բայց հիմա վերսկսվում են։
Թռիչքը կիրականացնի Boеing ինքնաթիռը։ Երևանից «Վնուկովո» օդանավակայան չվերթ կլինի ամեն օր, Երևանի ժամանակով 10։15-ին, իսկ Մոսկվայից Երևան` Մոսկվայի ժամանակով 12։45-ին։
Երևան-Մոսկվա չվերթն ամենապահանջված չվերթերից է։ Ամեն օր «Զվարթնոց» միջազգային օդանավակայանից մոսկովյան օդանավակայաններ և հակառակը` Երևան, իրականացվում է 14 չվերթ։ Դեկտեմբերի 16-ից ավիաընկերությունը շաբաթական երկու անգամ թռիչքներ կկատարի Երևան-Վորոնեժ-Երևան։ Տվյալ պահին գործում է Երևան-Թեհրան չվերթը»,- ասաց Խաչատրյանը։
«Արմենիայի» ավիապարկը ունի երկու ինքնաթիռ` Boeing 737-500 և Boeing 737-700։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանը ազգային ավիափոխադրողից զրկվեց 2013 թվականին, «Արմավիա» ընկերության սնանկացումից հետո: Հայաստանի ավիաշուկայում հայտնվեց Air Armenia ընկերությունը, որը, սակայն, 2014 թվականի հոկտեմբերին սնանկացավ ու դադարեցրեց ավիափոխադրումները:
