ԵՐԵՎԱՆ, 8 դեկտեմբերի — Sputnik. ԱԺ «Ժառանգություն» խմբակցության պատգամավոր Ռուբիկ Հակոբյանն այսօր ԱԺ-ում ներողություն հայցեց խորհրդարանից՝ երեկ իր մասնակցությամբ տեղի ունեցած միջադեպի համար, որի հետևանքով, ըստ նրա խոսքով, որոշ կայքերում ու սոցիալական ցանցերում ոչ դրական գնահատականներ են տրվել ԱԺ-ի հասցեին:
«Այդ միջադեպի մյուս կողմը լրագրող չի եղել, եղել է խուլիգան, որի հետագա գործունեությունը փորձել եմ կանխել»,- միջադեպին անդրադառնալով` ասաց պատգամավորը:
Ռուբիկ Հակոբյանն իր ելույթում դիմեց նաև լրագրողներին՝ ասելով. «Հարգելի՛ լրատվական դաշտ, ճիշտ եք անում, որ քննադատում եք բռնությունը, բայց կխնդրեի, որ այն լրագրողները, որոնք պատվեր են կատարում՝ թերթի, գլխավոր խմբագրի, մի քիչ ուսումնասիրեք՝ նրանք իրավունք ունեն լրագրությամբ զբաղվել, թե ոչ: Բարձր եմ գնահատում լրագրությունը, կուզեմ, որ այդ դաշտում լինեն իսկապես լրագրողներ, ոչ թե բանսարկու, տգետ անձինք»:
«Հրապարակ» օրաթերթի լրագրող Վահե Մակարյանը երեկ հայտարարել էր, որ ԱԺ-ում հարցազրույցից հետո ԱԺ պատգամավոր Ռուբիկ Հակոբյանը հայհոյել ու հարվածել էր իրեն: Պատգամավորը, թեև չի հերքում, որ իր և լրագրողի միջև միջադեպ է տեղի ունեցել, բայց չի հաստատում, որ հարվածել է լրագրողին:
Նյութի ռուսերեն տարբերակը
