ԵՐԵՎԱՆ, 8 դեկտեմբերի — Sputnik, Լաուրա Սարգսյան. Հայկական կողմը, «Ռոսատոմ» պետական կորպորացիայի հետ համատեղ, Հայաստանի ԱԷԿ-ի շահագործման ժամկետը երկարացնելու վերաբերյալ խոշոր նախագիծ է իրականացնում, Sputnik Արմենիայի հետ զրույցում ասաց «Ռոսատոմ Արևելյան Եվրոպա» ԲԲԸ-ի տնօրենի տեղակալ Վլադիմիր Գորնը։
«Սա խոշորագույն նախագիծ է, որը պետք է իրականացվի մի քանի տարում։ Այն իրագործելու դեպքում Հայաստանը կկարողանա էներգետիկ առումով անկախ դառնալ և իր համար էներգիա ապահովել առաջիկա տասը տարում», — ասաց Գորնը։
Գորնը նշեց նաև, որ Հայաստանի աշխարհագրական դիրքը հեռանկարներ է բացում էներգետիկայի ոլորտում` տարածաշրջանային կենտրոն դառնալու տեսանկյունից։
Հայաստանի ԱԷԿ-ի 2-րդ էներգաբլոկի շահագործման ժամկետի երկարացման նախագիծը քննարկվել է դեկտեմբերի 3-ին, Հայ-ռուսական համակարգող կոմիտեի համատեղ նիստի ժամանակ։ Կողմերը հաստատել են էներգաբլոկի սարքավորումների համալիր հետազոտման ավարտը։
Ներկա պահին ատոմակայանի 2-րդ էներգաբլոկն ապահովում է Հայաստանում սպառվող էլեկտրաէներգիայի 40%-ը։ Իսկ ժամկետի երկարացման վերաբերյալ աշխատանքները, կառավարության որոշման համաձայն, սկսվել են 2015 թվականին։
«Հարգանքի է արժանի այն, որ Հայաստանը, չնայած բազում դժվարություններ է ունեցել անկախության շրջանում, բայց շարունակել է ԱԷԿ-ի շահագործումը», — ասաց Գորնը` անհիմն համարելով խոսակցություններն այն մասին, թե հայկական ատոմակայանը սպառնում է տարածաշրջանային անվտանգությանը։
Ըստ նրա` նման խոսակցություններին պետք չէ ուշադրություն դարձնել, քանի որ Հայաստանի էներգետիկ համակարգն անվտանգ է, ատոմակայանը բարձր որակավորում ունեցող անձնակազմ ունի, որն ապահովում է տեխնիկական բոլոր պահանջները։
Հայկական ԱԷԿ-ի անվտանգության հարցում համոզված է նաև Հայաստանի ԱԷԿ-ի գլխավոր տնօրեն Սուրեն Ազատյանը։ Ապացույցն այն է, որ կառույցը կանգուն մնաց նույնիսկ 1988 թվականի երկրաշարժի ժամանակ։
«ԱԷԿ-ի կառուցման ժամանակ հաշվի է առնվել սեյսմիկ վտանգի գործոնը։ Եթե երկրաշարժի ուժգնությունը գերազանցում է 6 բալը, սկսում է գործել անվտանգության համակարգը, որն ամբողջովին անջատում է գործող բլոկը», — Sputnik Արմենիայի հետ զրույցում հստակեցրեց Ազատյանը։
Նա նշեց, որ գիտնականներն այնքան ճիշտ վայր են ընտրել կայանի կառուցման համար, որ 1988 թվականի դեկտեմբերի 7-ից հետո հավելյալ պաշտպանության անհրաժեշտություն չառաջացավ։ ԱԷԿ-ն այդ ամբողջ ընթացքում աշխատում էր սովորական ռեժիմով։
Հայաստանի ատոմակայանը գտնվում է Մեծամորում, Երևանից 28 կմ հեռավորության վրա։ 2014 թվականի մարտին Հայաստանի կառավարությունը որոշում կայացրեց մինչև 2026 թվականը երկարացնել հայկական ԱԷԿ-ի շահագործման ժամկետը` նոր միջուկային էներգաբլոկի կառուցման ձգձգման պատճառով։ ՀԱԷԿ-ի շահագործման ժամկետի երկարացումը կիրականացվի 270 մլն դոլարի ռուսական պետական արտահանման վարկի և 30 մլն դոլարի դրամաշնորհի հաշվին։ Մեծամոր քաղաքի մոտ գործող ատոմային էլեկտրակայանը միակն է տարածաշրջանում։ Ներկա պահին աշխատում է միայն երկրորդ բլոկը` 407,5 ՄՎտ հզորությամբ։
