ԵՐԵՎԱՆ, 6 դեկտեմբերի — Sputnik. Մոսկվայի Տիմիրյազևյան դատարանում կողոպուտի մասին քրեական գործի վերաբերյալ նիստի ժամանակ մահացել է 66-ամյա փաստաբան Սիմոն Ծատուրյանը, հաղորդում է «ՌԻԱ Նովոստին»`հղում անելով դատարանի մամուլի քարտուղարին:
«Քրեական գործի քննման ժամանակ, կողմերի հայտարարությունների փուլում, փաստաբան Սիմոն Ծատուրյանը վատացել է: Նրա համար շտապօգնություն են կանչել, բժիշկները կես ժամ փորձել են փրկել փաստաբանի կյանքը, բայց անօգուտ»,- ասել է մամուլի քարտուղարը: Նրա խոսքով` բժիշկները փաստել են, որ փաստաբանը մահացել է սրտի անբավարարությունից:
Ռուսաստանի քննչական կոմիտեն ստուգում է սկսել փաստաբանի մահվան փաստով։ Պատահարի հանգամանքները պարզվում են։
