ԵՐԵՎԱՆ, 6 դեկտեմբերի — Sputnik. Այսօր խորհրդարանում ԱԺ փոխխոսնակ Էդուարդ Շարմազանովն անդրադարձավ Ադրբեջանի նախագահ Իլհամ Ալիևի հայտարարությանը և նշեց` Ադրբեջանի նախագահն իր հայտարարությամբ փաստում է, որ Ղարաբաղյան հակամարտության հարցում ոչ շահեկան դիրքում է։
«Ինչո՞ւ է աղմկում Ալիևը, շատ պարզ է, քանի որ բանակցային գործընթացում ոչ շահեկան իրավիճակում է գտնվում, փակուղում է հայտնվել, և պատահական չէ, որ հենց Ալիևն է ասել, որ միջազգային հանրությունը ստիպում է իրեն ճանաչել Ղարաբաղի անկախությունը: Առաջին անգամ Ադրբեջանի ղեկավարը փաստում է իր ոչ շահեկան դիրքերը՝ բանակցությունների հետ կապված»,-ասաց ԱԺ փոխխոսնակը:
ԱԺ փոխնախագահը հիշեցրեց՝ ժամանակին մի քանի անգամ առաջարկել է Ալիևին ու Ադրբեջանի իշխանությանն ընդհանրապես ընթերցել հին հունական, հռոմեական պատմիչներին:
«Նրանք համառորեն չարեցին դա, դրանից հետո առաջարկեցի, քանի որ ճամփորդել շատ են սիրում, լինել Հռոմում և տեսնել հին աշխարհի քարտեզը, այնտեղ հաստատ գտնեն Հայաստան, բայց չեն գտնի Ադրբեջան»,-ասաց նա:
Քանի որ Ադրբեջանը Շարմազանովի այս խորհրդին էլ չի հետևել, այսօր նա հորդորեց կարդալ «Աուդիի» և «Մերսեդես Բենցի» պատմությունները։
«Քանի որ Ադրբեջանի ղեկավարությունը շատ է սիրում երթևեկել թանկարժեք մեքենաներով, թող կարդան «Աուդիի» և «Մերսեդես-Բենցի» պատմությունները և կտեսնեն, որ «Աուդին» 9 տարով է մեծ Ադրբեջանից, իսկ «Մերսեդես-Բենցը»՝ 2 տարով»:
