ԵՐԵՎԱՆ, 5 դեկտեմբերի — Sputnik. Փորձագետները վաղը` դեկտեմբերի 6-ին, կսկսեն ուսումնասիրել Սանկտ Պետերբուրգի Հաղթանակի հրապարակում տեղադրվող հուշարձանի էսքիզների տարբերակները։ Այս մասին հայտնում է «Նևսկիե նովոստի» գործակալությունը։
«Միացյալ խաչ» հուշարձանը կխորհրդանշի հայ և ռուս ժողովուրդների միասնականությունը։
Մոնումենտի տեղադրման նախաձեռնողը «Երևանի և Պետերբուրգի գործնական համագործակցության կենտրոն» ՀԿ-ն է։
Մի մեծ քարի կտորից կերտված հուշարձանը կպատկերի խաչի վրա խոնարհված երկու կնոջ։ Նմանատիպ հուշարձան կա նաև Երևանի կենտրոնում։ Հուշարձանը կառուցված է սպիտակ-մոխրագույն գրանիտից, բարձրությունը 4,5 մետր է։ Պատվանդանին հայերեն և ռուսերեն արձանագրված է. «Օրհնյալ է հայ և ռուս ժողովուրդների դարավոր բարեկամությունը»։
Հիշեցնենք, որ 2014 թվականին Երևանի քաղաքապետը Պետերբուրգի մարզպետ Գեորգի Պոլտավչենկոյին առաջարկել էր բարեկամական հուշարձան տեղադրել։
