ԵՐԵՎԱՆ, 5 դեկտեմբերի — Sputnik. Հանրահայտ երգիչ Դիմա Բիլանը հարցազրույց է տվել МузТВ-ին և պատմել, որ այժմ զբաղվում է 1915 թվականի ցեղասպանության մասին երգի տեսահոլովակի նկարահանման աշխատանքով: Այս մասին հայտնում է yerkramas.org–ը։
Նրա խոսքով՝ նկարահանումներն արդեն ընթացքի մեջ են. որոշ տեսարաններ նկարահանել են Արարատյան դաշտում, աշխատանքները կշարունակեն «Մոսֆիլմի» տաղավարում:
«Ինձ այդ թեման ծանոթ է ոչ միայն պատմությունից,- ասել է Բիլանը,- մորական կողմից նախատատս՝ Շուշան Տիգրանի Կրունին, 13 տարեկանում փրկվել է մահից: Նրան օգնել են ռուսները: Ցավոք, նախատատս իմ ծնվելուց առաջ է մահացել, բայց մորս պատմելով՝ ամբողջ կյանքի ընթացքում փնտրել է հարազատներին՝ այդպես էլ չիմանալով ողջ են, թե մեռած:
Տեսահոլովակի թողարկումը նախատեսված է մյուս տարվա ապրիլին: Երգիչն այն կնվիրի նախատատին ու Օսմանյան կայսրությունում զոհված միլիոնավոր հայերին:
