Նելլի Դանիելյան, Sputnik.
Հայկական բանակն աստիճանաբար համալրվում է պայմանագրային զինծառայողներով: Սահմանային որոշ տեղամասերում այսօր շուրջօրյա հերթապահություն են իրականացնում բացառապես պայմանագրային զինծառայողներից կազմված միավորումները:
Այսպիսիների թվում է նաև Տավուշի մարզի այն սահմանապահ դիրքը, որտեղ այցելեց նաև Sputnik Արմենիան:
Իջևանի բնակիչ Կապիտան Հրայր Խաչատրյանն ամսվա կեսն անցկացնում է ընտանիքից ու հարազատներից հեռու՝ հայրենիքի սահմանին:
Մեզ հետ զրույցում նա նշեց, որ թեև դժվար է օրեր շարունակ ընտանիքից հեռու լինելը, բայց պայմանագրային ու առավել փորձառու զինվորականներից կազմված անձնակազմում ծառայությունն ավելի կազմակերպված ու հեշտ է անցնում:
«Քանի որ բոլորն էլ տնից-տեղից կտրված են, այստեղ չկա կին, չկա երեխա, հայր, մայր, ապրում ենք կարոտով: Ու փորձում ենք նաև մեկս մյուսի նկատմամբ հոգատար լինել, լրացնել այդ բացը: Իհարկե, չմոռանալով նաև անընդհատ զգոնություն պահպանելու մասին, հատկապես` լարված օրերին»,- ասաց մեր զրուցակիցը:
Ինչ վերաբերում է զինվորականի ուղին ընտրելուն, Հրայր Խաչատրյանը հայտնեց, որ մեծացել է զինվորականի ընտանիքում և իր ընտրությամբ ու գիտակցաբար է շարունակում հոր գործը:
![Военнослужащий армянской армии Грайр Хачатрян Военнослужащий армянской армии Грайр Хачатрян - Sputnik Արմենիա](https://cdn.am.sputniknews.ru/img/568/22/5682212_0:0:1600:1065_600x0_80_0_0_5e8e8af973c7853acdf96fd5d3e069d2.jpg)
Տավուշի մարզի Խաշթառակ գյուղի բնակիչ, սերժանտ Սուրեն Խանումյանն էլ երեք որդիների հայր է: Անչափ կարոտում է երեխաներին, դժվար օրեր է անցկացնում առանց նրանց, բայց վստահ է՝ սահմանամերձ գյուղում սեփական ընտանիքի անվտանգությունը անձամբ է ապահովում:
«Ընտանիք պահելու խնդիր չէր, ես այս ծառայությունն ընտրեցի, քանի որ սահմանամերձ գյուղում եմ բնակվում: Ճիշտ է` երեխաները մի քիչ դժվար են հարմարվում իմ բացակայությանը, բայց պետք է հարմարվեն»,- ասաց սերժանտ Խանումյանը և ավելացրեց` շատ կցանկանար, որ երեք որդիներից գոնե մեկն իր ճանապարհով գնար և ընտրեր զինվորականի մասնագիտությունը:
![Военнослужащий армянской армии Сурен Ханумян Военнослужащий армянской армии Сурен Ханумян - Sputnik Արմենիա](https://cdn.am.sputniknews.ru/img/568/22/5682274_0:0:1600:1065_600x0_80_0_0_336f109d360d628c95e9c4ce4637df14.jpg)
Թե որքանով է հայկական զինուժը համալրված պայմանագրային զինծառայողներով ու որքան է նրանց և ժամկետային զինծառայողների թվի հարաբերությունը, պաշտպանության նախարարությունը չի հրապարակում, բայց հայտարարում է, որ տարեցտարի պայմանագրայինների թիվն ավելանում է, զինված ուժերի որոշակի գործառույթներ արդեն իսկ իրականացվում են բացառապես նրանց ուժերով:
«Բայց ՀՀ-ում դեռ երկար ժամանակ կպահպանվի խառը համալրման սկզբունքը, ասել է թե՝ ժամկետայինը պահպանվելու է, զուգահեռաբար ավելանալու է նաև պայմանագրայինների թիվը»,- Sputnik Արմենիայի հարցին ի պատասխան նշեց ՀՀ ՊՆ մամուլի քարտուղար Արծրուն Հովհաննիսյանը՝ ավելացնելով, որ մարտունակության տեսակետից խառը համալրումը զինված ուժերի ղեկավարությունն այսօր ամենաճիշտ տարբերակն է համարում: