ԵՐԵՎԱՆ, 4 դեկտեմբերի- Sputnik. Վերջին օրերի ընթացքում գրանցված առատ տեղումների և ուժեղ քամու հետևանքով վնասվել են Վրաստանի ծովափնյա և լեռնային շրջանների ենթակառուցվածքները: Վնասի չափը դեռ պարզ չէ: Բաթումի հայտնի ծառուղին ու «Այբուբենի աշտարակ» տանող հատվածը պատվել են ավազով ու մանրաքարերով: Այս մասին հայտնում է Sputnik Գրուզիան:
«Հատուկ ծառայությունների աշխատակիցներն աշխատում են արտակարգ ռեժիմով: Բաթումի ծառուղին շուտով նախկին տեսքը կունենա: Տարածքը կմաքրվի և կարգի կբերվի»,- ասել է Աջարիայի Ինքնավար Հանրապետության կառավարության նախագահ Զուրաբ Պատարաձեն:
Ծովափնյա մյուս քաղաքներում գիշերվա փոթորկից հետո ճանապարհներ են քանդվել, ծառեր են տապալվել, վնասվել են էլեկտրահաղորդման գծերը, որոշ հատվածներում ծովի ալիքները հասել են մինչև ափամերձ տներ և պոկել տանիքները:
ՀՀ արտակարգ իրավիճակների նախարարությունը պարբերաբար կապ է հաստատում Վրաստանի հանրապետության ճանապարհների շահագործման և շինարարական օպերատիվ հերթապահի հետ, որը տեղեկություն է հայտնում Լարսի ավտոճանապարհի վերաբերյալ: Նշենք, որ ժամը 20.00-ի դրությամբ ճանապարհը շարունակում է փակ մնալ:
