ԵՐԵՎԱՆ, 4 դեկտեմբերի — Sputnik. Շվեդիայի թուրքական համայնքային կազմակերպությունները վարկաբեկվելուց բացի նաև ֆինանսական կորուստներ են կրում թուրքական կազմակերպությունների համակարգող կենտրոնի նախկին նախագահ Բարբարոս Լեյլանիի հակահայկական արտահայտությունների պատճառով, Sputnik Արմենիային ասաց Շվեդիայում Հայաստանի արտակարգ և լիազոր դեսպան Արտակ Ապիտոնյանը:
Դեկտեմբերի 1-ին Շվեդիայում կայացել է Բարբարոս Լեյլանիի դեմ դատական գործի առաջին նիստը: Նա 2016թ-ի ապրիլի 9-ին «Սերգել» կենտրոնական հրապարակում հակահայկական ցույցի ժամանակ հանդես էր եկել ռասիստական և ազգայնամոլական հայտարարություններով:
Ապիտոնյանի խոսքով՝ Լեյլանիի դեմ գործ է հարուցվել 50 հայցերից հետո, որոնք ներկայացրել են հիմնականում հայկական կառույցները, այդ թվում՝ հայկական կազմակերպությունների համակարգող խորհուրդը և «Հայ դատի» տեղի գրասենյակը: Հայկական դեսպանատունը հետևում է այդ ամենին:
Շվեդիայի ներքին օրենքներով՝ մյուս ազգությունների նկատմամբ ատելության քարոզչությունը հանցագործություն է պետության դեմ, ուստի մեղադրող կողմում ոչ թե առանձին անձինք են, այլ՝ պետական դատախազը:
«Մենք հետևում ենք դատական գործընթացին: Տպավորություն կա, որ շվեդները ձգտում են արագ ավարտել դատավարությունը, որպեսզի այն համայնքների միջև հարաբերությունների լրացուցիչ սրման չհանգեցնի: Օրենսդրության համաձայն՝ մեղադրողը Լեյլանիի համար պահանջում է պայմանական ազատազրկում և տուգանք», — ասաց Ապիտոնյանը:
Նրա խոսքով՝ շվեդները, ինչպես նաև հասարակական և քաղաքական օղակները հանդես են եկել Լեյլանիի հայտարարության սուր քննադատությամբ, այդ թվում վարչապետի և արտգործնախարարի մակարդակով: Կառավարության թուրք անդամներից մեկը ստիպված է եղել հրաժարական տալ:
Բացի այդ, թուրքական հասարակական կազմակերպություններից շատերը զրկվել են պետական ֆինանսավորումից և համագործակցությունից:
