ԵՐԵՎԱՆ, 4 դեկտեմբերի — Sputnik, Արմենուհի Մխոյան. Տարիների ընթացքում կատարված ուսումնասիրությունները ցույց տվեցին, որ ամենավտանգավոր «մարդասպան» շենքերը Լենինականի, այսպես կոչված, «111 սերիայի կարկասային» 9-հարկանիներն էին՝ խոշորապանել բազմաբնակարան շենքերը, որոնց 94%-ը քանդվեց ցնցումներից կամ դարձավ վերականգնման համար ոչ պիտանի:
Հենց նմանատիպ շենքերով էին կառուցված Լենինականի «Եռանկյունի» և «Շիրակացի» թաղամասերը:
Այս շենքերի մեծ մասը փլվեց անմիջապես, շատ քիչ տոկոսը պահպանվեց, բայց այդ շենքերում էլ այլևս հնարավոր չէր ապրել, քանի որ 4-րդ կամ 5-րդ աստիճանի վթարայնություն ունեին: Այս մասին փաստում է երկրաբանական գիտություններ դոկտոր, պրոֆեսոր Սերգեյ Նազարեթյանը:
Ամենաամուրները մասնավոր սեկտորի կառույցներն էին. Լենինականում գրանցված բազմահազար զոհերից միայն 300-ն են բնակվելիս եղել 1 կամ 2 հարկանի տներում, որոնք կառուցված են եղել կավե և կրե շաղախով, առանց մետաղի օգտագործման: Մարդկանց մեծ մասն էլ մահացել է այն ժամանակ, երբ երկրաշարժի երկրորդ ցնցումից հետո տնից դուրս է փախել:
Ըստ որոշ աղբյուրների՝ երկրաշարժի հետևանքով միայն Լենինականում զոհվել է 17 հազար մարդ, 1200-ը՝ Վանաձորում, 4000-ը՝ Սպիտակում, 500-ը՝ Ախուրյանում և 120-ը՝ Ստեփանավանում: Ավերվել է 11 քաղաք, 58 գյուղ, 9 միլիոն քառակուսի մետր բնակտարածք, որն ամբողջ հանրապետության բնակֆոնդի 18 տոկոսն էր կազմում:
Փլատակների տակից դուրս է բերվել 45 հազար մարդ, հոսպիտալացվել՝ 40 հազարը, տարհանվածների քանակը կազմել է 120 հազար մարդ:
Ավերվել է 170 արդյունաբերական ձեռնարկություն՝ 1,9 միլիարդ ԱՄՆ դոլար համախառն արտադրանքով: Ավերված կառույցների մեջ մեծ թիվ են կազմել դպրոցները (ավերված դպրոցների և այլ հաստատությունների թիվը` 917 շենք, առողջապահական 250, մշակութային 324 օբյեկտ), վնասվել է պատմաճարտարապետական 2300 հուշարձան, որից 1216-ը դարձել են կիսավեր:
