ԵՐԵՎԱՆ, 4 դեկտեմբերի — Sputnik. Հաճախ մարդկանց մոտ սուր շնչառական հիվանդություն է սկսվում հիվանդին խնամելու ժամանակ, երբ չեն պահպանում անվտանգության կանոնները: Այս մասին Sputnik Արմենիային ասաց Առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Լիլիթ Ավետիսյանը:
Նրա խոսքով` մարդիկ պետք է իմանան, թե ինչպես է պետք շփվել սուր շնչառական հիվանդություն ունեցող մարդու հետ, որպեսզի վարակը չփոխանցվի ընտանիքի մյուս անդամներին:
«Հիվանդը սովորաբար հայտնվում է ընտանիքի անդամների ուշադրության կենտրոնում: Բոլորը մոտենում են անկողնում պառկած հիվանդին, ամբողջ ընտանիքով նստում նրա մոտ: Եթե անգամ հիվանդը որոշում է հեռուստացույց դիտել, բոլորը կրկին նրա շուրջ են հավաքվում», — ասաց Ավետիսյանը:
Այնինչ դա սխալ մոտեցում է սեփական օրգանիզմի պաշտպանության առումով: Ավետիսյանի խոսքով` ընտանիքի միայն մեկ անդամը պետք է խնամի հիվանդին:
«Նա, ով խնամում է հիվանդին, անպայման պետք է դիմակ կրի, ընդ որում՝ դիմային մակերերսից չպետք է հպվի այդ դիմակին, որովհետև այնտեղ հարուցիչներ կան: Հետո էլ պետք է շատ զգուշությամբ դեն նետի այն», — ասաց փորձագետը:
Նրա խոսքով՝ հիվանդի սենյակի դուռը պետք է փակ լինի, իսկ պատուհանը պետք է հաճախ բացել սենյակն օդափոխելու համար: Ավետիսյանը նշեց, որ պետք չէ մոռանալ սենյակի օդափոխության մասին, նույնիսկ եթե դրսում ցուրտ է:
«Հիվանդին պետք է մեծ քանակությամբ հեղուկ տալ և անպայման բժիշկ հրավիրել, որպեսզի նա ճիշտ բուժում նշանակի: Բարդություններից խուսափելու համար ոչ մի դեպքում չի կարելի ինքնաբուժությամբ զբաղվել: Երբեմն հիվանդին հակաբիոտիկներ են տալիս՝ առանց բժշկի նշանակման, ինչը կարող է լուրջ հետևանքների հանգեցնել` ընդհուպ մինչև թոքաբորբ», — ասաց նա:
Ավետիսյանը խորհուրդ է տալիս հիվանդանալու դեպքում խուսափել հասարակական վայրերից և հասարակական տրանսպորտից, անպայման հետևել փռշտալու և հազալու հիգիենային, օգտվել մեկանգամյա օգտագործման անձեռոցիկներից, այնուհետև դրանք ծալել և նետել աղբամանը:
Հայաստանի առողջապահության նախարարությունում կարծում են, որ տարվա այս հատվածում գրիպի սրացումը բնական է: Նոյեմբերի սկզբին երկրում սուր շնչառական հիվանդությունների ակտիվացում էր նկատվում, հատկապես՝ դպրոցականների շրջանում:
Նախարարության վերջին տվյալների համաձայն` երեխաների շրջանում հիվանդության դեպքերի նվազման միտում է նկատվում: Դպրոցները շարունակում են գործել նորմալ ռեժիմով: Ամեն օր անցկացվում է, այսպես կոչված, համաճարակային ֆիլտր` ստուգում են աշակերտներին ու դպրոցների անձնակազմին, և եթե ինչ-որ մեկի մոտ գրիպի ախտանշաններ են նկատում, անմիջապես տուն են ուղարկում:
