ԵՐԵՎԱՆ, 3 դեկտեմբերի — Sputnik. Հելսինկյան քաղաքացիական ասամբլեայի Վանաձորի գրասենյակը հրապարակել է «2016 թ. ապրիլին պատերազմական գործողությունների ընթացքում մահացած զինծառայողների մահվան հանգամանքների և նրանց ընտանիքների սոցիալական ապահովության վիճակի մասին» զեկույցը: Պաշտպանության նախարարությունն այժմ մանրամասն ուսումնասիրության է ենթարկում զեկույցում նշված փաստերը և վերջնական գնահատական կներկայացնի դրանց ավարտին:
Իսկ մինչ այդ ՀՀ ՊՆ մամուլի խոսնակ Արծրուն Հովհաննիսյանն այսօր լրագրողների հետ զրույցում ներկայացրեց զեկույցի վերաբերյալ ՊՆ նախնական գնահատականը՝ զեկույցը կոչելով «ոչ պրոֆեսիոնալ»:
«Դրանում խաղացել են մարդկանց զգացմունքների վրա»,- ասաց նա:
Անդրադառնալով զեկույցում առկա մտահոգություններին, թե տանկերից մեկի մեջ վառելիք չի եղել և այն չի կարողացել մարտական գործողությունների վայր հասնել՝ Հովհաննիսյանը հերքեց այդ տեղեկությունները՝ ավելացնելով, որ նման բան չի կարող լինել:
«Եթե պետք է, ես պատրաստ եմ մասնագիտորեն ապացուցել, թե ինչպես հնարավոր չէ տանկից մինչև վերջ վառելիքը թափել: Դա ֆիզիկապես հնարավոր չէ, որովհետև ինչքան թափես՝ տակն անպայման 40-60 լիտր մնալու է։ Այդ 60 լիտրով տանկը 2 օր կաշխատեր»,- ասաց նա:
Զեկույցում ներառված է նաև ապրիլյան պատերազմի ժամանակ զոհված տանկիստներից մեկի ծնողների հետ զրույցը, որտեղ զինվորի ծնողները կասկածներ են հայտնել, թե իրենց է հանձնվել ոչ իրենց որդու աճյունը, քանի որ ոստիկանները երեք օր հսկել են տղայի դագաղն ու որևէ մեկին թույլ չեն տվել բացել այն:
Արծրուն Հովհաննիսյանի խոսքով՝ տանկը խոցելու պարագայում անձնակազմի անդամների մարմինները, ցավոք, չեն կարող ամբողջությամբ պահպանվել և հաճախ ծնողներին են բերվում միայն նրանց մասունքները:
Զեկույցում նշված այլ տեղեկությունների մասին նախարարությունը խոստանում է մեկնաբանություններ ներկայացնել ավելի ուշ:
