ԵՐԵՎԱՆ, 3 դեկտեմբերի — Sputnik. ԲՀԿ-ի քաղաքական խորհուրդը դիմել է Գագիկ Ծառուկյանին՝ խնդրելով վերադառնալ քաղաքականություն, Sputnik Արմենիային ասաց ԱԺ ԲՀԿ խմբակցության քարտուղար Վահե Էնֆիաջյանը:
«Կուսակցության քաղաքական խորհուրդը, հաշվի առնելով Հայաստանի տասնյակ հազարավոր քաղաքացիների ցանկությունները, որոշել է դիմել Գագիկ Ծառուկյանին՝ խնդրելով վերադառնալ քաղաքականություն», — ասաց Էնֆիաջյանը:
Քաղխորհրդի դիմումի տեքստը Ծառուկյանին հանձնելու պահին նրա տան մոտ բազմահազարանոց բազմություն է հավաքվել, մարդիկ պահանջել են, որ նա քաղաքականություն վերադառնա:
Էնֆիաջյանի խոսքով՝ Ծառուկյանը հավաքվածներին ասել է, որ առաջիկա օրերին իր ելույթում կանդրադառնա այդ հարցին:
ԲՀԿ նախկին առաջնորդ Գագիկ Ծառուկյանը հեռացել է ակտիվ քաղաքականությունից 2015թ-ի գարնանը Հայաստանի նախագահ Սերժ Սարգսյանի հետ տարաձայնությունից հետո: Դրանից հետո կուսակցությունն անցել է ընդդիմության շարքերը, սակայն ԲՀԿ շատ ներկայացուցիչներ, չցանկանալով լքել զբաղեցրած պաշտոնները, դուրս են եկել կուսակցությունից:
