ԵՐԵՎԱՆ, 3 դեկտեմբերի — Sputnik. Երևանի բնակիչներից մեկը 2016 թ-ի դեկտեմբերի 1-ին ՀՀ ՊՆ ռազմական ոստիկանության քրեական հետախուզության բաժնում հաղորդում և բացատրություն է տվել այն մասին, որ 2016 թ-ի փետրվարին մի քաղաքացու միջնորդությամբ և երաշխավորությամբ 7000 ԱՄՆ դոլար, այնուհետև ևս 250 000 ՀՀ դրամ գումար է տվել ոմն Ե.Մ.-ի՝ որդուն 2016 թ-ի ամառային զորակոչին տարկետում տրամադրելու նպատակով:
Այս մասին լրագրողներին հայտնեց ՊՆ մամուլի քարտուղար Արծրուն Հովհաննիսյանը՝ հղում անելով ՊՆ ռազմական ոստիկանության քրեական հետախուզության բաժնին։
Որդին, սակայն, 2016թ-ի հուլիսի 7-ին զորակոչվել է ՀՀ ԶՈւ՝ պարտադիր ժամկետային զինվորական ծառայության: Փաստորեն, Ե. Մ.-ն զինակոչիկի հորը տված խոստումը չի կատարել, իսկ վերցրած գումարն էլ չի վերադարձրել:
Փաստի առթիվ Ռազմական ոստիկանության քրեական հետախուզության բաժնում այժմ նյութեր են նախապատրաստվում, Ռազմական ոստիկանություննն էլ հորդորում է զորակոչիկների և զինծառայողների ծնողներին զերծ մնալ խարդախներից, որոնք զինծառայությունից ազատելու պատրվակով ծնողներից խոշոր չափի գումարներ են կորզում:
Ռազմական ոստիկանությունը վստահեցնում է նաև, որ ռազմական իր աշխատակիցների օպերատիվ-հետախուզական միջոցառումների արդյունքում նմանատիպ գործողությունները կկասեցվեն, կատարողներն էլ կպատժվեն օրենքի ողջ խստությամբ։
