ԵՐԵՎԱՆ, 30 նոյեմբերի — Sputnik. Հայաստանի և Ռուսաստանի պաշտպանության նախարարներ Վիգեն Սարգսյանը և Սերգեյ Շոյգուն չորեքշաբթի ստորագրել են երկու երկրի Զորքերի միավորված խմբավորում ստեղծելու մասին համաձայնագիրը։
Սարգսյանի խոսքով` խմբավորման մեջ կմտնեն Հայաստանի տարածքում տեղակայված 102-րդ ռուսական ռազմակայանը և ՀՀ զինված ուժերի ստորաբաժանումները։
Նախարարն ընդգծել է, որ խմբավորումը ստեղծվում է անհրաժեշտության դեպքում առաջադրանքները համատեղ ուժերով կատարելու նպատակով։ Հայաստանի և Ռուսաստանի ՊՆ ղեկավարները ստորագրել են նաև 2017թ-ի համագործակցության ծրագիր։
