ԵՐԵՎԱՆ, 30 նոյեմբերի — Sputnik. ՀՀ ԱԻՆ «Հիդրոմետ» ծառայության կանխատեսումների համաձայն` ձմռան առանձին օրերի ընթացքում կարող են խիստ սառնամանիքներ լինել։ Գյուղատնտեսության նախարարությունն այդ կապակցությամբ հորդորում է չհետաձգել այգեթաղի աշխատանքները։
«Հիշեցնում ենք, որ խաղողի վազի լավ հասունացած ու փայտացած մատերը կարող են դիմանալ մինչև —16° ցրտին, իսկ դրանից ավելի ցածր ջերմաստիճանների դեպքում կորուստներն արդեն անխուսափելի են»,- նշված է նախարարության հաղորդագրության մեջ։
ՀՀ գյուղատնտեսության նախարարությունը հորդորում է խաղողագործներին, օգտվելով ներկայիս եղանակային պայմաններից, սեղմ ժամկետում ավարտել այգեթաղի աշխատանքները, որպեսզի կայուն երաշխիքներ ստեղծվեն հաջորդ տարվա բերքի ստացման համար։
