Եգիպտոսի խորհրդարանում Հայոց ցեղասպանության ճանաչման հարցը բարձրացնելը պայմանավորված է Եգիպտոսի և Թուրքիայի հարաբերությունների սրմամբ: Sputnik Արմենիայի եթերում նման կարծիք հայտնեց արաբագետ Արմեն Պետրոսյանը։
«Հարաբերությունները սրվեցին հատկապես 2013 թվականի հուլիսից հետո, երբ Եգիպտոսում հեղաշրջում եղավ թուրքական գործող վարչակարգի և նոր իշխանությունների միջև։ Մինչև այժմ թուրքական իշխանություններն օրինական իշխանության վերականգնում են պահանջում։ Ասել է, թե ամբողջությամբ չեն ճանաչում գործող իշխանությանը»,- ասաց արաբագետը։
Նրա խոսքով` այդ համատեքստում եգիպտական խորհրդարանում փորձ է արվում Թուրքիայի դեմ որոշակի հակաքայլեր օգտագործել, և այդ տրամաբանության մեջ էլ դիտարկվում են Հայոց ցեղասպանության հիմնախնդրի քննարկումները։
«Հետագա ընթացքի մասին, բնականաբար, չեմ կարող որևէ բան ասել։ Գուցե այդ քննարկումներն ավելի մեծ արձագանք ստանան, սակայն չեմ կարող պնդել, որ Եգիպտոսում կընդունվի Հայոց ցեղասպանության փաստը»,- ասաց նա։
