ՀՀ առողջապահության նախարարության Հիվանդությունների վերահսկման և կանխարգելման կենտրոն ՊՈԱԿ-ի գլխավոր տնօրենի տեղակալ Լիլիթ Ավետիսյանը Sputnik Արմենիայի եթերում խոսում է այս լաբորատորիաների ստեղծման նպատակների մասին։
Նրա խոսքով` լաբորատորիաները շատ լուրջ դերակատարում պետք է ունենան, քանի որ Հայաստանը գտնվում է այնպիսի մի գոտում, որտեղ մեծ է միգրացիան, հետևաբար բավական բարձր է հավանականությունը, որ հիվանդությունները մուտք կգործեն մեր երկիր։
Առողջապահության ռեֆերենս լաբորատորիան պետք է կարողանա հնարավորինս վաղ հայտնաբերել վտանգները և արձագանքել դրանց` թույլ չտալով դրանց տարածումը մեր երկրի տարածքում և երկրից դուրս։
«Այս լաբորատորիաները զուտ հետազոտական են և այս խնդիրը լուծելու նպատակ ունեն»,- նշեց Ավետիսյանը։
Ըստ նրա` ռեֆերենս լաբորատորիաների ստեղծման գործընթացը համակարգում է ազգային անվտանգության ծառայությունը, ուստի այն մտավախությունը, որ լաբորատորիաների գոյությունը կարող սպառնալ ազգային անվտանգությանը, որևէ հիմք չունի։
