ԵՐԵՎԱՆ, 27 նոյեմբերի — Sputnik. Արյան չարորակ հիվանդություններ ունեցող հայաստանցիներն այլևս ստիպված չեն լինի մեկնել արտերկիր` Ռուսաստան, Գերմանիա կամ Իսրայել, ոսկրածուծի փոխպատվաստման համար:
Ավելին, եթե նշված երկրներում փոխպատվաստումն արժե 150-200 հազար դոլար, ապա Հայաստանում այն կարժենա 40-50 հազար դոլար: Պատահական չէ, որ հարևան երկրներից արդեն իսկ Արյունաբանական կենտրոնում հերթագրվածներ կան:
«Այսօր արյան չարորակ հիվանդություններ ունեցող 181 երեխա կա երկրում: Փոխպատվաստման կարիք ունի տարեկան 60 հիվանդ»,- ասաց Յոլյանի անվան արյունաբանական կենտրոնի տնօրեն Սմբատ Դաղբաշյանը:
Կենտրոնում հոգալու են նաև երեխաների սննդի հարցը: Եթե նախկինում ծնողները տանը ուտելիք էին պատրաստում և բերում հիվանդանոց, ապա այսօր վերանորոգված խոհանոցում կենտրոնի կողմից երեխաներին տրվելու է համապատասխան սնունդ, որը, ամենակարևորը, չի վնասի բուժման կուրսին: Սնունդը խոհանոց է բարձրացվելու հատուկ վերելակով:
«Մենք երեխաներին ուզում ենք այստեղ կերակրել, հաշվարկել ենք, թե տարեկան որքան գումար կպահանջվի: Ամբողջ սնունդը տրվելու է «Նվիրիր կյանք» հիմնադրամի կողմից: Նախնական հաշվարկով` ամսական 3-5 միլիոն դրամ կպահանջվի»,- ասաց Դաղբաշյանը:
Ոսկրածուծի փոխպատվաստման բաժանմունքում բժիշկ Կարեն Մելիքսեթյանը ներկայացրեց այն պայմանները, որոնց շնորհիվ ոչ մի ավելորդ փոշի, առավել ևս վարակ, չի մտնի բաժանմունք:
«Պատերը ծածկված են հատուկ պոլիվինիլային ծածկույթով, որն անընդմեջ պատվում է հատուկ հականեխիչ նյութով: Բուժման արդյունքում մինչև փոխպատվաստումը հիվանդի իմունիտետը հասցնելու ենք զրոյի, այնուհետև նրան ներարկելու ենք արյունաստեղծ ցողունային բջիջներ, որոնք վերցված են լինելու կա՛մ ոսկրածուծից, կա՛մ պերիֆերիկ արյունից: 15-20 օրվա մեջ աճում են այդ բջիջները»,- ասաց բժիշկը:
Հենց այդքան ժամանակ՝ մոտ 3 շաբաթ հիվանդները մնում են այդ բաժանմունքում, հետո տեղափոխվում սովորական հիվանդասենյակ:
Ոսկրածուծի փոխպատվաստման բաժանմունքում մուտքը լինելու է խիստ սահմանափակ: Եթե անհրաժեշտության դեպքում մտնեն ծնողները, հատուկ բախիլներ ու մեկանգամյա օգտագործման վերնազգեստ պետք է հագնեն:
Այնտեղ սենյակի օդը բացարձակ մաքուր է: Տեղակայված են բարձր զգայունության ֆիլտրեր, իսկ սենյակի դռներն այնպես են ստեղծված, որ օդը սենյակից միայն կարող է դուրս գալ:
Ի դեպ, բացի տեխնոլոգիական հագեցվածությունից, շենքը կառուցված է սեյսմակայունության բոլոր չափանիշներով:
Ոսկրածուծի փոխպատվաստման բաժանմունքի, ինչպես նաև տարածաշրջանում եզակի, միջազգային ISO և JACIE չափանիշներին համապատասխանող Ցողունային բջիջների լաբորատորիայի ստեղծման արդյունքում մի շարք արյան հիվանդությունների բուժման «ոսկե ստանդարտ» համարվող ոսկրածուծի փոխպատվաստումը հասանելի է դարձել նաև Հայաստանում:
