ԵՐԵՎԱՆ, 26 նոյեմբերի — Sputnik. «Հավաքվել են մի 30-40 հոգի, բանակցությունների սառեցման մասին որոշում են ընդունել: Ինձ բռնապետ էին ասում, ահա այդպիսի մտածողության դեմ ես, իսկապես, բռնապետ եմ, այո»,- հայտարարել է Թուրքիայի նախագահ Ռեջեփ Թայիփ Էրդողանը, որը զայրույթով է ընդունել Եվրամիությանը այդ երկրի անդամակցության շոուրջ բանակցությունները սառեցնելու որոշումը։
Այդ մասին հայտնել է Թուրքիայի «Ջումհուրիյեթ» թերթը, որը հայտնի է թուրքական կառավարության՝ իսլամականների հետ գործակցելու վերաբերյալ նյութեր հրապարակելով և Հայոց ցեղասպանության փաստն ընդունելու կոչերով։
Ըստ պարբերականի՝ Էրդողան իրեն «արդար ու անկեղծների հանդեպ ողորմած» մարդ է հայտարարել, իսկ Թուրքիայի՝ ԵՄ մտնելու դեմ քվեարկածների հանդեպ՝ բռնապետ:
Երկու օր առաջ՝ նոյեմբերի 24-ին, 479 կողմ, 37 դեմ և 107 ձեռնպահ ձայնով Եվրախորդարանը ընդունել է ԵՄ-ին Թուրքիայի անդամակցության շուրջ բանակցությունների սառեցման մասին որոշում։ Դրա համար պատճառ են հանդիսացել Թուրքիայում հուլիսի 15-ի զինված հեղաշրջման փորձից հետո տիրող անկայուն իրավիճակը, բռնությունները:
