Եվգենի Պլյուշչենկոն Sputnik Արմենիային պատմեց իր ապագայի ծրագրերի մասին: Զրուցեց Անի Լիպարիտյանը:
-Ո՞րն է հաջողության գաղտնիքը:
Իրականում, ոչ մի գաղտնիք չկա: Պետք է շատ աշխատել: Իհարկե, սպորտային կյանքում բախտս բերել է, իմ մարզիչն է եղել Ալեքսեյ Նիկոլաևիչ Միշինը: Նրա հետ աշխատել եմ ավելի քան 20 տարի: Ես բախտավոր եմ նաև թիմի հարցում, որն օգնել և օգնում է ինձ մինչև հիմա, և, իհարկե, աշխատասիրությունը:
-Ի՞նչ խորհուրդ կտայիք երիտասարդ գեղասահորդներին:
Չհանձնվել, չընկճվել: Եթե ինչ-որ բան չի ստացվում, միևնույն է, պետք է նպատակ դնես քո առաջ և հասնես դրան: Պետք է լսել մարզիչներին, ծնողներին և հաճույքով անել այն, ինչով զբաղվում ես:
Եթե դու սիրում ես քո գործը, ապա արդյունքները սպասեցնել չեն տա իրենց: Եթե դու չես սիրում քո գործը, ապա ոչինչ չի ստացվի:
-Դուք երազանք ունե՞ք:
Այո, ես երազում եմ, որ իմ ընտանիքը և հարազատներն առողջ լինեն: Դա ամենագլխավորն է: Մնացած ամեն ինչը կա: Ես կորցրել եմ մորս և հասկացել, որ եթե առողջություն չկա, ապա անհնար է ինչ-որ բան անել: Ուստի ուզում եմ, որ հարազատներս առողջ լինեն:
-Հայաստանի հետ կապված ծրագրեր ունե՞ք: Պատրա՞ստ եք օգնել մեր երկրում գեղասահքը զարգացնելու գործում:
Ես բաց եմ, երրորդ անգամ եմ այցելում Հայաստան, ձեր երկիրն ինձ համար հարազատ է դարձել: Մենք փորձեցինք այստեղ դպրոց բացել. անցած տարի բանակցություններ ընթացան, բայց առայժմ արդյունքներ չկան: Ես պատրաստ եմ, եթե պետք է իմ օգնությունը, ապա մեծ հաճույքով:
-Տեսնու՞մ եք արդյոք Ձեր որդի Սաշային մարզական աշխարհում: Դատելով Instagram-ից՝ նա արդեն սահում է սառույցի վրա:
Որդիս 100 տոկոսով մարզիկ է լինելու: Առայժմ չգիտեմ, թե որ մարզաձևն ենք ընտրելու:
Նա սիրում է սպորտը, ֆուտբոլը, և, ցավոք սրտի, գեղասահքը, ոչ թե հոկեյը: Մայրը տրամադրված է գեղասահքի: Առայժմ պայքար է ընթանում: Ես ուզում եմ յուրացնել նոր մարզական կյանք, բացահայտել նոր մարզաձևի գաղտնիքները, տեսնել մեծ սպորտի դժվարությունները: Երբ Մոսկվայում եմ լինում, տղայիս հետս տանում եմ սառույցի վրա սահելու: Նա հաջողություններ է գրանցում: Ի դեպ, նա մասնակցելու է մեր «Շչելկունչիկ» հեքիաթ-շոուին:
Դա նրա դեբյուտը կլինի:
Եվգենի Պլյուշչենկոն Ռուսաստանի 10-ակի չեմպիոն է, Եվրոպայի յոթակի չեմպիոն, աշխարհի եռակի չեմպիոն, Օլիմպիական խաղերի կրկնակի արծաթե մեդալակիր և կրկնակի օլիմպիական չեմպիոն:
Պլյուշչենկոն, Ադելինա Սոտնիկովան, որն առաջին անգամ է ժամանել Հայաստան, և Ֆլորիան Ամոդիոն կմասնակցեն յուրահատուկ սառցե շոուին, որը տեղի կունենա Երևանում նոյեմբերի 27-ին, Կարեն Դեմիրճյանի անվան մարզահամերգային համալիրում:
Ծրագրում կմասնակցեն հայտնի ռուս երգիչներ, երաժիշտներ, պարողներ, կրկեսային և օրիգինալ ժանրերի ներկայացուցիչներ, գեղասահքի աստղեր, մոդելավորողներ: Մասնավորապես, ելույթ կունենան ջազի թագուգի Մարիամ Մերաբովան և «Միրայֆ» խումբը, երգչուհի Իվետա Մուկուչյանը, Սոնան, Քսենոնան, Ալյոնա Վասիլևան և վիրտուոզ ջութակահար Էդգար Հակոբյանը:
