ԵՐԵՎԱՆ, 26 նոյեմբերի — Sputnik. ՀՀԿ 16-րդ համագումարն այսօր վերահաստատեց Սերժ Սարգսյանի թեկնածությունը ՀՀԿ նախագահի պաշտոնում: Սերժ Սարգսյանն առաջադրված միակ թեկնածուն էր: Նրա թեկնածությունն առաջադրեց Երևանի քաղաքապետ Տարոն Մարգարյանը:
Առաջադրված միակ թեկնածուի թեկնածությունը քվեարկվեց բաց և անցավ միաձայն:
Սերժ Սարգսյանը շնորհակալություն հայտնելով կուսակիցներին իրեն վերընտրելու կապակցությամբ, նշեց, որ կուսակցությունը պատասխանատու ժամանակահատված է մտնում, բայց ունի կուռ թիմ, տարիների հարուստ փորձ:
ՀՀԿ համագումարն ընտրեց նաև ՀՀԿ ԳՄ նոր կազմը, որն այսուհետև կբաղկացած կինի 21 անդամից: ԳՄ նորացված կազմում համագումարը միաձայն հաստատեց Սերժ Սարգսյանի, Հովիկ Աբրահամյանի, Արմեն Աշոտյանի, Կարեն Ավագյանի, Վահրամ Բաղդասարյանի, Գագիկ Բեգլարյանի, Ռուբեն Թադևոսյանի, Մուշեղ Լալայանի, Կարեն Վիլհելմի Կարապետյանի, Կարեն Սարգսի Կարապետյանի, Հրանուշ Հակոբյանի, Դավիթ Հարույունյանի, Արփինե Հովհաննիսյանի, Տարոն Մարգարյանի, Գագիկ Մինասյանի, Հերմինե Նաղդալյանի, Սամվել Նիկոյանի, Էդուարդ Շարմազանովի, Գալուստ Սահակյանի, Սամվել Ֆարմանյանի թեկնածությունները:
Ռազմիկ Զոհրաբյանն ու Դերենիկ Դումանյանն, այսպիսով, դուրս մնացին ՀՀԿ ԳՄ կազմից:
Սերժ Սարգսյանը ՀՀԿ ղեկավար կազմի այս փոփոխությունները մեկնաբանեց կանանց և երիտասարդների ավելացման անհրաժեշտությամբ:
ՀՀԿ համագումարի որոշմամբ՝ որոշ փոփոխություններ իրականացվեցին նաև ՀՀԿ կանոնադրության մեջ: Դրանց արդյունքում կուսակցությունն այսուհետև կունենա կուսակցության նախագահի առաջին տեղակալ, իսկ ՀՀԿ-ն՝ ավագների խորհուրդ:
