ԵՐԵՎԱՆ, 25 նոյեմբերի — Sputnik, Արմենուհի Մխոյան. Անցած մեկ ամսվա ընթացքում բոլորին ու հատկապես գյումրեցիներին տանջում էր մեկ հարց՝ «Պոբեդան»` իր 7 հազար դրամանոց տոմսով: Անհավանական թվացող չվերթի հայտնվելու համար ուրախացել էին շատերը, հատկապես «խոպան» գնացողերն ու Գյումրու օդանավակայանի աշխատողները. մեկի համար «Զվարթնոց» մեկնելու փոխարեն գումարի տնտեսում է, մյուսի համար` վերջապես գործող օդանավակայանում աշխատանքի անցնելու հնարավորություն։ Սակայն օդանավակայանից դեռ խուսափում են պաշտոնական տեղեկություն տրամադրել չվերթի մասին:
Արդեն 3 օր ավիատոմսերի վաճառքով զբաղվող ընկերություններում և առցանց սկսվել է տոմսերի վաճառքը։ Համաձայն ավիաընկերության պաշտոնական կայքի տվյալների` ավիատոմսերը լինելու են երեք տեսակի՝ «Ստանդարտ», «Պլյուս» և «Պրեմիում»:
«Ստանդարտ» ավիատոմսը կարժենա 7189 դրամ (998.86 ռուբլի), որի դեպքում ուղևորը կարող է իր հետ ինքնաթիռ բարձրացնել մինչև 10 կգ ձեռքի ուղեբեռ, սակայն ուղևորի նստատեղը նախապես որոշված է: «Պլյուս» ավիատոմսը կարժենա 15425 դրամ (2097.86 ռուբլի) նույն պայմաններով, միայն ուղևորն ինքը կարող է որոշել, թե որտեղ նստի, «Պրեմիում» տոմսը կարժենա 44660 դրամ (5998.86 ռուբլի), որի դեպքում ուղևորը կարող է նաև մինչև 20 կգ ուղեբեռ ունենալ:
Այս պարագայում արդեն իսկ շատերը նշում են, որ թանկից էժանը չկա տարբերակն ավելի ճիշտ է. մի՞թե Գյումրիից Մոսկվա մեկնողը դատարկ կգնա ծանոթ-բարեկամի տուն՝ առանց բաստուրմայի ու չեչիլ պանրի: «Պոբեդայի» բոլոր «տնտեսումները» մեկնողների համար ընդունելի են, բացի այս մեկից: Գյումրեցիները կատակում են. «7500-ի թռցրածն ի՞նչ բդի էղնի»:
«Պոբեդայի» առաջին՝ դեկտեմբերի 15-ի թռիչքի համար տոմսերը վաճառվում են։ Սակայն հայտարարված 7189 դրամ արժեքով տոմս մեզ չհանդիպեց, վաճառքն իրականացնող ընկերություններում կային ավելի թանկ՝ մինչև 10 հազար դրամ նվազագույն արժեքով տոմսեր։ Ինչպես տեղեկացրեցին նշված ընկերություններում, ներառվել է նաև այսպես կոչված հավելյալ ծառայության արժեքը։
Ամեն դեպքում, թե ինչ է սպասում, ինչպես գյումրեցիներն են ասում, «էքստրիմի սիրահար «Հաղթանակով»» Մոսկվա մեկնողներին, կերևա դեկտեմբերի 15-ին, իսկ մինչ այդ նրանք «Կատակում են գյումրեցիները խմբում» «կազմել» են էժան ավիաընկերության մոտավոր պատկերը. «Պոբեդան» ինքդ գնիր, ինքդ թռիր տարբերակն է։ Ինքնաթիռն էլ երթուղային տաքսի կհիշեցնի` «լյոտչիկի դռան վրա իկոնաներ, ճամփին էլ` ռաբիզ երաժշտություն, միակ լավ բանն էն է, օր կանգառից դուս չի կանգնի»:
