ԵՐԵՎԱՆ, 25 նոյեմբերի — Sputnik. Աստված երես է տվել հայերին, քանի որ նրանք մշակութային և պատմական հսկայական ժառանգություն ունեն, Sputnik Արմենիային ասաց Հովհաննես Շարամբեյանի անվան ժողովրդական ստեղծագործության կենտրոնի գիտության հարցերով փոխտնօրեն Եվգենյա Քալանթարյանը։
Նրա խոսքով` հայերը չեն կարողանում պահպանել, զարգացնել և հայրենիքի սահմաններից դուրս ճիշտ ներկայացնել իրենց ունեցածը։
«Սա ազգ է, որն ունի գեղանկարչություն, գորգագործություն, երաժշտություն, գրականություն։ Հավանաբար մեզ համար դա սովորական երևույթ է և դրան հատուկ նշանակություն չենք տալիս։ Բերեմ մի օրինակ` մանկատան երեխաները երազում են ծնողներ ունենալ, իսկ ապահով ընտանիքների երեխաների համար մայրը և հայրը «սովորական երևույթ են»։ Հայերի դեպքում նույնն է»,- ասաց Քալանթարյանը։
Նրա կարծիքով` հայերը լուրջ չեն վերաբերվում այս հարցին։
«Հարևան երկրներում տարեցտարի յուրացնում են մեր արվեստի գործերը` գորգերը, խաչքարերը և ոչ միայն։ Խնդիրը մեր անվտանգությունն է։ Մենք այդ ամենը տեսնում ենք, բայց ոչինչ չենք անում։ ԱՄՆ-ում վերջերս լույս է տեսել «Մահմեդական գորգեր» անվանումով հսկայածավալ ամսագիր։ Գրքում ներկայացվել են գորգեր, որոնց 98 տոկոսը հայկական է` հայոց գրերով»,- նշեց Քալանթարյանը։
Նրա խոսքով` հայ մասնագետները և գիտնականները կարող էին հերքում գրել, բայց չեն գրել։
«Մեր գիտաժողովն էլ նվիրված է նրան, որ թեկուզ փոքր ձեռքբերում արձանագրենք այս ոլորտում։ Կարծում եմ, որ այստեղ կարելի է ներգրավել երիտասարդությանը, արվեստագետներին։ Նրանք պետք է երիտասարդ լինեն, եռանդով և էնտուզիազմով լի, որովհետև գորգերով զբաղվող պրոֆեսիոնալներն այսօր շատ քիչ են Հայաստանում։ Ես ուրախ եմ, որ զեկույցների հեղինակների շարքում կան երիտասարդներ, որոնք հնարավոր է` լրջորեն վերաբերվեն դրան։ Հուսով եմ, որ դա կնպաստի հայկական մշակույթի տարածմանը»,- ասաց Sputnik Արմենիայի զրուցակիցը։
Քալանթարյանը նշեց, որ հայերը պետք է պատշաճ ուշադրություն դարձնեն իրենց ավանդույթներին և մշակութային ժառանգությանը։
«Մեր ավանդույթներում շատ գեղեցիկ, դրական բան կա, և պետք է մատուցել հենց դա։ Երբ սովորում էի Սանկտ Պետերբուրգում, հասկացա, որ մարդիկ Հայաստանի մասին միայն երկու բան գիտեն` Հայոց ցեղասպանություն և 1988թ-ի երկրաշարժ։ Չնայած այդ ամենին` մենք շատ կենսուրախ և տաղանդավոր ազգ ենք։ Պետք է կարողանանք դրսևորվել»,- ասաց նա։
Քալանթարյանը հույս ունի, որ Հայաստանի մշակույթի նոր նախարար Արմեն Ամիրյանը ջանք չի խնայի հայկական մշակույթի զարգացման գործում։
