ԵՐԵՎԱՆ, 23 նոյեմբերի — Sputnik. Հայտնի ծովանկարիչ Հովհաննես Այվազովսկու կտավների ցուցահանդեսը, որը նվիրված էր նրա ծննդյան 200-ամյակին, Տրետյակովյան պատկերասրահի ամենաշատ այցելուներ ունեցած ցուցահանդեսներից է եղել։
2016 թվականին նկարչի գործերը տեսնելու էր եկել ավելի քան 600 հազար մարդ։
«Այվազովսկու հետահայաց ցուցադրության առաջին իսկ օրերից պարզ դարձավ, որ այցելուների հետաքրքրությունն այս ցուցահանդեսի նկատմամբ ավելի բարձր է, քան Վալենտին Սերովի աշխատանքների ցուցահանդեսի հանդեպ։ Թանգարանին հաջողվեց զանգվածային այցերի բազմաթիվ բացասական հետևանքներից խուսափել նորարարությունների շնորհիվ։ Այվազովսկու ցուցահանդեսի համար առաջին անգամ թանգարանի պրակտիկայում այցելուների համար ցուցահանդեսը սեանսներով դիտելու համակարգ էր մշակվել, ինչպես նաև կիրառվել էր տոմսերի նախնական վաճառքի համակարգ կայքերում և թանգարանի դրամարկղերում», — նշել են թանգարանից։
Պատկերասրահի տվյալներով` ցուցահանդես է այցելել 598 հազար 832 մարդ, այն դեպքում, երբ Սերովի ցուցահանդես այցելել է շուրջ 486 հազար մարդ։ Միաժամանակ Տրետյակովյան պատկերասրահում նախատեսում են վերլուծել ցուցահանդեսի աշխատանքի ընթացքում ի հայտ եկած խնդիրները և ամեն ինչ անել, որպեսզի մյուս ցուցահանդեսները ավելի հանգիստ ռեժիմով ընթանան։ Մասնավորապես` խոսքը տոմսերի վաճառքի հետ կապված չարաշահումների մասին է, այդ պատճառով 2017 թվականի հունվարից թանգարանում անվանական տոմսերի վաճառք է մտցվում։
